ირაკლი ღარიბაშვილის ესტონეთის პრემიერთან ერთად თანათავმჯდომარეობა პრაღაში, დისკუსიაზე, ძალიან მნიშვნელოვანი სიგნალია იმისა, რომ საქართველო ევროპული ოჯახის განუყოფელი ნაწილია, – ამის შესახებ საქართველოს საგარეო საქმეთა მინისტრმა, ილია დარჩიაშვილმა განაცხადა.
„ის, რომ საქართველოს პრემიერ-მინისტრი მოწვეული იყო და ესტონეთის პრემიერ-მინისტრთან ერთად თანათავმჯდომარეობდა დისკუსიას „მშვიდობისა და უსაფრთხოების საკითხებზე ევროპაში“, ვფიქრობ, ძალიან მნიშვნელოვანი სიგნალია იმისა, რომ საქართველო ევროპული ოჯახის განუყოფელი ნაწილია, საქართველოს ამ ოჯახში აქვს განსაკუთრებული მნიშვნელობა.
ძალიან საინტერესო მრგვალი მაგიდა გამოვიდა, რომელშიც სხვადასხვა ლიდერები მონაწილეობდნენ. ვფიქრობ, ძალიან საინტერესო შეხვედრა გამოვიდა, რომელიც აკეთებს აქცენტს ყველა იმ გამოწვევაზე, რომელიც ევროპას აქვს“,- აღნიშნა დარჩიაშვილმა.
საქართველოს მთავრობის ადმინისტრაციის ინფორმაციით, პრაღაში, ევროპული პოლიტიკური გაერთიანების პირველი სამიტის ფარგლებში გამართულ დისკუსიაზე, რომელსაც საქართველოს პრემიერ-მინისტრი ირაკლი ღარიბაშვილი თავმჯდომარეობდა, არსებულ გეოპოლიტიკურ ვითარებასა და უკრაინაში მიმდინარე სამხედრო მოქმედებებზე ისაუბრეს. მათივე ცნობით, საქართველოს პრემიერ-მინისტრს, ირაკლი ღარიბაშვილსა და ესტონეთის პრემიერ-მინისტრს კაია კალასს ღონისძიების ორგანიზატორებმა თემატური დისკუსიის, „მშვიდობა და უსაფრთხოება ევროპის კონტინენტზე“, თანათავმჯდომარეობა შესთავაზეს.
