NATO-ს გენერალური მდივანი იენს სტოლტენბერგი აცხადებს, რომ ამჟამად უკრაინაში მიმდინარე ომში რუსეთის სახმელეთო ძალების 80%-ია ჩართული. ის ალიანსის ქვეყნებს უკრაინისთვის მეტი სამხედრო აღჭურვილობის მიწოდებისკენ მოუწოდებს.
ამის შესახებ ალიანსის გენმდივანმა 9 სექტემბერს, აშშ-ის სახელმწიფო მდივანთან, ენტონი ბლინკენთან ერთად გამართულ პრესკონფერენციაზე ისაუბრა.
სტოლტენბერგმა აღნიშნა, რომ NATO-ს ქვეყნებმა იარაღით, ტყვია-წამლით და სხვა საბრძოლო რესურსებით უკრაინას უპრეცედენტო დახმარება უკვე გაუწიეს. მისი თქმით, მართალია, ეს დახმარება საკუთარი სამხედრო რესურსების შემცირების ხარჯზე ხდება, თუმცა ეს რესურსები, სინამდვილეში, არა მხოლოდ უკრაინის, არამედ მთლიანი ალიანსის რუსეთის აგრესიისგან დაცვისთვისკენაა მიმართული.
“სინამდვილეში, იმაში დარწმუნებით, რომ რუსეთი და პრეზიდენტი პუტინი ვერ მოიგებს ომს უკრაინაში, ჩვენ ასევე ვზრდით ჩვენსავე უსაფრთხოებას და ვამყარებთ ალიანსს იმის დამტკიცებით, რომ ჩვენს საზღვრებთან ახლოს ამ ტიპის ქცევას არ დავუშვებთ. ასე რომ, ამ [დასავლეთის შეიარაღების] მარაგების გამოყენება სინამდვილეში გვეხმარება ჩვენივე უსაფრთხოების გაზრდაში და რუსეთის მხრიდან NATO-ს მოკავშირე ქვეყნებისადმი აგრესიის რისკების შემცირებაში.
ასევე დავამატებ, რომ რუსული სახმელეთო ძალების 80%-ზე მეტია ახლა უკრაინაში ომისკენ მიმართული. რა თქმა უნდა, რაც იქ მოხდება ამას გავლენა ექნება რუსეთის მთლიან უნარზე, შექმნას რამენაირი საფრთხე NATO-ს მოკავშირე ქვეყნებისთვის. ჩემი უპირველესი გზავნილი მოკავშირეებისადმი არის ის, რომ მივესალმოთ უპრეცედენტო მხარდაჭერას, მოგიწოდებთ კიდევ უფრო მეტი მხარდაჭერისკენ და მოგიწოდებთ, რომ კიდევ უფრო მეტი ინვენტარი, მარაგები მოიძიოთ, რათა განვაგრძოთ იმ მასალების მიწოდება უკრაინისთვის, რაც მათ მყისიერად სჭირდებათ. და ჩვენ ვხედავთ რომ ამას ხმელეთზე უდიდესი ცვლილებები მოაქვს.“ - განაცხადა იენს სტოლტენბერგმა.
