კუბილიუსი პირდაპირ ჩართულია იმ კამპანიაში, რომლის მიზანიც არის საქართველოს ქცევა მეორე ფრონტად, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.
„ქართული ოცნების“ თავმჯდომარემ უპასუხა ჟურნალისტის კითხვას ევროპარლამენტარ ანდრიუს კუბილიუსის განცხადებასთან დაკავშირებით, რომელმაც თქვა, რომ ირაკლი კობახიძემ ევროპარლამენტარ ვიოლა ფონ კრამონს ბოდიში დაუყოვნებლივ უნდა მოუხადოს. საუბარია ირაკლი კობახიძის გუშინდელ განცხადებაზე, რომ „ადამიანი როცა ლაპარაკობს ისეთ რაღაცებს, რაც ვიოლა ფონ კრამონმა ილაპარაკა, ის არსად არის შესაშვები, არათუ გვარამიასთან ან სხვასთან“.
როგორც ირაკლი კობახიძემ აღნიშნა, კუბილიუსს თავად აქვს ბოდიში მოსახდელი ქართული საზოგადოებისა და ქართული სახელმწიფოს წინაშე, რადგან ის, ნებსით თუ უნებლიეთ, ჩართულია იმ კამპანიაში, რომლის მიზანიც საქართველოს ქცევა მეორე ფრონტად.
„შეგახსენებთ, რა თქვა ვიოლა ფონ კრამონმა. ვიოლა ფონ კრამონმა თქვა ასეთი რაღაც, რომ ევროპარლამენტის რეზოლუცია და კონკრეტულად მისი ის ნაწილი, რომელიც ეხებოდა ივანიშვილის სანქცირებას, შემუშავდა ამერიკელ პარტნიორებთან ერთად. წარმოიდგინეთ, ასეთი რამ თქვა ვიოლა ფონ კრამონმა. ამის შემდეგ, როგორ შეიძლება, შეფასდეს ეს ადამიანი, თავად განსაზღვრეთ. როდესაც ასეთ ბრალს უყენებ და უკადრებელს ჰკადრებ ამერიკელ პარტნიორებს, რას იმსახურებს, რა შეფასებას იმსახურებს ეს ქალბატონი, თავად შეგიძლიათ, განსაზღვროთ.
არ ვიცი, რა ამოძრავებს კუბილიუსს. შეიძლება, ეჭვები მქონდეს, მაგრამ, არ ვიცი. კუბილიუსი პირდაპირ ჩართულია იმ კამპანიაში, რომლის მიზანიც არის საქართველოს ქცევა მეორე ფრონტად. პირადად კუბილიუსი არის პირდაპირ ჩართული ამ კამპანიაში. რა ამოძრავებს, არ ვიცი, რა არის მისი მოტივაცია, არ ვიცი, მაგრამ ამ კამპანიის ნაწილი, ნებსით თუ უნებლიეთ, ის ნამდვილად არის. აქედან გამომდინარე, კუბილიუსს ბოდიში აქვს მოსახდელი ქართული საზოგადოების და ქართული სახელმწიფოს წინაშე“, – განაცხადა ირაკლი კობახიძემ.
