„ნაციონალური მოძრაობის“ წევრი ლევან ბეჟაშვილი მოძრაობა „ხალხის ძალის“ წევრების განცხადებასთან დაკავშირებით აღნიშნავს, რომ მათ ვერ გაურჩევიათ, ვინ არის მთავარი საფრთხე საქართველოს ეროვნული ინტერესებისა და დამოუკიდებლობისთვის.
„ქართული ოცნების“ ანტიდასავლური კამპანია უკვე სამარცხვინო ხასიათს იღებს. ამ ოთხეულის როტორიკა პრაქტიკულად შეესაბამება რუსეთში, ბელარუსსა და ჩრდილოეთ კორეაში არსებულ განცხადებას, სადაც არასამთავრობო ორგანიზაციები, ოპოზიცია და ყველა ხალხის მტერი და ამერიკის აგენტია. ამ ადამიანებს ვერ გაურჩევიათ, ვინ არის საქართველოს ეროვნული ინტერესებისთვის და ჩვენი დამოუკიდებლობისთვის მთავარი საფრთხე. ამიტომ არის, რომ საზოგადოებაში „ქართულ ოცნებას“ რუსულ ოცნებას ეძახიან“, – აღნიშნა ლევან ბეჟაშვილმა.
რაც შეეხება მოძრაობა „ხალხის ძალის“ წევრების განცხადების იმ ნაწილს, სადაც საუბარია, რომ „ვარდების რევოლუციის“ შემდეგ მოსული ხელისუფლების მთავარი ლიდერები და იდეოლოგები ამერიკულ აგენტურაში განსაკუთრებულ ადგილს იკავებდნენ“, – ბეჟაშვილის თქმით, ეს არის რუსული ნარატივი.
„ვარდების რევოლუციამ“ სათავე დაუდო თანამედროვე წარმატებულ ქართულ სახელმწიფოს. მიხეილ სააკაშვილი და მთელი მისი გუნდი იყო თანამედროვე ქართული სახელმწიფოს არქიტექტორი. ამიტომ ვარდების რევოლუციის მოხსენიება ამერიკის აგენტობად და ა.შ. არის რუსული ნარატივი, რუსული აგენტურის მიერ საქართველოში გავრცელებული ნარატივი. სამწუხაროა, რომ ხელისუფლებაში გვყავს ისეთი ძალა, რომელიც საქართველოში რუსული აგენტურის ნარატივს პირდაპირ ახმოვანებს“, – აღნიშნა ლევან ბეჟაშვილმა.
მოძრაობის „ხალხის ძალა“ წევრებმა, სოზარ სუბარმა, დიმიტრი ხუნდაძემ, გურამ მაჭარაშვილმა და მიხეილ ყაველაშვილმა განცხადება გაავრცელეს, რომელიც შეეხება „რამდენიმე ქართულ მედიასაშუალებაში გავრცელებულ წერილს საქართველოში მოქმედი ამერიკული აგენტურის შესახებ“. სოზარ სუბარი, დიმიტრი ხუნდაძე, გურამ მაჭარაშვილი და მიხეილ ყაველაშვილი განცხადებაში აღნიშნავენ, რომ პარტნიორი სახელმწიფოს აგენტობა ზუსტად ისეთივე სამშობლოს ღალატი და უღირსი ქმედებაა, როგორიც ოკუპანტი სახელმწიფოს აგენტობა.
პარლამენტის წევრების თქმით, „ამერიკელების მიერ აგენტურის ქსელის შექმნას გარკვეული რაციონალური ახსნა თუ აქვს, ქართველების აგენტობას იოტისოდენა გამართლებაც ვერ ექნება“. ამასთან, მოძრაობა „ხალხის ძალის“ წევრების განცხადებით, „შემაშფოთებელია, რომ აშშ-ის საელჩო თავის აგენტურას დღეს პოლარიზაციისთვის, ხალხის ნების წინააღმდეგ ხელისუფლების შეცვლისა და მეორე ფრონტის გახსნის მცდელობისთვის იყენებს“.
