რუსი სამხედროების მხრიდან გახსნილი ცეცხლის შემდეგ ზაპოროჟიეს ატომური ელექტროსადგურის ავარიულმა დამცავმა სისტემამ მეხუთე ელექტრობლოკი გამორთო. აღნიშნულის შესახებ ინფორმაციას უკრიანული მედია „ენერგოატომზე“ დაყრდნობით ავრცელებს.
„ატომური საერთაშორისო სააგენტოს მისიის ვიზიტის წინ რაშისტებმა ბირთვულ სადგურზე ახალ პროვოკაციეს მიმართეს. პირველ სქტემბერს, 04:57 საათზე რუსული საოკუპაციო ძალების მხრიდან ნაღმტყორცნებიდან ზაპოროჟიეს ატომური ელექტროსადგურის პლატფორმისთვის გახსნილი ცეცხლის შედეგად ამუშავდა ავარიული დაცვა და გაითიშა მომუშავე მეხუთე ენერგობლოკი“, – ნათქვამია „ენერგოატომის“ განცხადებაში.
უკრაინის ეროვნული ატომური კომპანიის ცნობით, ოკუპანტებმა ასევე დააზიანეს ატომური სადგურის სარეზევრო ელექტროკვების ხაზი, რის გამოც დენის მიწოდება შეუწყდა გაჩერებულ მეორე ენერგობლოკს. ენერგოატომში აცხადებენ, რომ ბოლო 10 დღის განმავლობაში ოკუპანტების ქმედებების გამო, ზაპოროჟიეს სადგურზე ენერგობლოკი უკვე მეორედ გაითიშა.
კომპანიაში აცხადებენ, რომ მეექვსე ენერგობლოკი უკრაინის ენერგოსისტემაში მუშაობას განაგრძობს, სადგურის უკრაინული პერსონალი კი ყველაფერს აკეთებს ინფრასტრუქტურის დაზიანებების ლიკვიდაციისთვის.
შეგახსენებთ, დღეს საერთაშორისო ატომური სააგენტოს მისიამ ზაპოროჟიეს ელექტროსადგურზე მუშაობა უნდა დაიწყოს. მისიის წევრებმა სააგენტოს დირექტორის რაფაელ გროსის ხელმძღვანელობით, ზაპოროჟიეს სასტუმრო უკვე დატოვეს და სადგურისკენ გაემართნენ.
