„ბიბისის“ ინფორმაციით, რუსეთის თავდაცვის მინისტრი სერგეი შოიგუ აცხადებს, რომ რუსეთი განზრახ ანელებს შეტევის ტემპს, რადგან ცდილობს, თავიდან აიცილოს მსხვერპლი მშვიდობიან მოსახლეობაში. მედიის ცნობით, აღნიშნულის შესახებ რუსეთის თავდაცვის მინისტრმა ტაშკენტში, შანხაის თანამშრომლობის ორგანიზაციის თავდაცვის მინისტრების შეხვედრაზე განაცხადა.
„სპეციალური ოპერაციის დროს ჩვენ მკაცრად ვიცავთ ჰუმანიტარული სამართლის ნორმებს. დარტყმები უკრაინის შეიარაღებული ძალების სამხედრო ინფრასტრუქტურაზე – სამეთაურო პუნქტებზე, აეროდრომებზე, საწყობებზე, სამხედრო-სამრეწველო კომპლექსის ობიექტებზე ხორციელდება მაღალი სიზუსტის იარაღით. ამავდროულად, ყველაფერი კეთდება, რათა თავიდან იქნას არიდებული მსხვერპლი მშვიდობიან მოსახლეობაში. რა თქმა უნდა, ეს ანელებს შეტევის ტემპს, მაგრამ ჩვენ ამას შეგნებულად ვაკეთებთ“, – განაცხადა შოიგუმ.
უკრაინის ხელისუფლების, ასევე საერთაშორისო ორგანიზაციებისა და დასავლეთის ქვეყნების წარმომადგენლებმა არაერთხელ განაცხადეს, რომ რუსი სამხედროების მოქმედებების შედეგად, ძირითადად მშვიდობიანი მოსახლეობა იღუპება, რადგან დარტყმების უმეტესობა ქალაქების სამოქალაქო ინფრასტრუქტურაზე მოდის.
