საქართველომ სასამართლო სისტემის ფართომასშტაბიანი რეფორმა უნდა განახორციელოს, მათ შორის შექმნას მოსამართლეთა კეთილსინდისიერების საგანგებო შემოწმების მექანიზმი, რომელშიც საერთაშორისო ექსპერტებს გადამწყვეტი როლი ექნებათ. ამის შესახებ ევროკომისიის 2026 წლის გაფართოების ანგარიშშია ნათქვამი, რომლის ძირითად მოთხოვნებსაც საქართველოს პირველი არხი ავრცელებს.
ევროკომისიის შეფასებით, აუცილებელია იუსტიციის უმაღლესი საბჭოს რეფორმირება ვენეციის კომისიის რეკომენდაციების შესაბამისად. განსაკუთრებული ყურადღება უნდა დაეთმოს სასამართლო სისტემის ხელმძღვანელ თანამდებობებზე დანიშნული პირებისა და კანდიდატების კეთილსინდისიერების შემოწმებას.
ანგარიშის თანახმად, საგანგებო შემოწმება უნდა გავრცელდეს იუსტიციის უმაღლესი საბჭოს წევრებზე, უზენაესი სასამართლოს ხელმძღვანელ პოზიციებზე მყოფ პირებსა და საერთო სასამართლოების თავმჯდომარეებზე, ასევე შესაბამის თანამდებობებზე წარდგენილ კანდიდატებზე.
ევროკომისია ხაზს უსვამს, რომ ამ პროცესში საერთაშორისო ექსპერტების მონაწილეობა მხოლოდ საკონსულტაციო ხასიათის არ უნდა იყოს და მათ გადაწყვეტილების მიღებაზე გადამწყვეტი გავლენა უნდა ჰქონდეთ.
აღნიშნული მოთხოვნები სასამართლო სისტემის დამოუკიდებლობის, ანგარიშვალდებულებისა და საზოგადოების ნდობის უზრუნველყოფას უკავშირდება.
