უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტ დონალდ ტრამპთან სატელეფონო საუბარი გამართა. ზელენსკის განცხადებით, ლიდერები ნიუ-იორკში შეხვედრაზე შეთანხმდნენ, რომელსაც, მისი შეფასებით, მნიშვნელოვანი შედეგების მოტანა შეუძლია.
„ახლახან ვესაუბრე პრეზიდენტ დონალდ ტრამპს. ეს იყო მნიშვნელოვანი საუბარი, რა დროსაც ბევრი საკითხი განვიხილეთ. შევთანხმდით ნიუ-იორკში შეხვედრაზე; ამ შეხვედრას ბევრი რამის შეცვლა შეუძლია. დიპლომატიური პროცესი აქტიურ ფაზაშია“, — წერს ზელენსკი.
უკრაინის პრეზიდენტის თქმით, მან ტრამპს მადლობა გადაუხადა მისი წარმომადგენლების, სტივ უიტკოფისა და ჯარედ კუშნერის, კიევში ვიზიტისთვის. ზელენსკის განცხადებით, მათ უკრაინაში არსებული ვითარება ადგილზე ნახეს და უკრაინულ მხარესთან ძირითადი საკითხები დეტალურად განიხილეს.
„მშვიდობის მიღწევის გზა ჩვენი უმთავრესი პრიორიტეტია“, — აღნიშნა უკრაინის პრეზიდენტმა.
ზელენსკის განცხადებაში ნიუ-იორკში დაგეგმილი შეხვედრის ზუსტი თარიღი მითითებული არ არის.
