ევროკავშირმა შესაძლოა რუსეთის მოქალაქეებისთვის ტურისტული ვიზების გაცემის პრაქტიკას გადახედოს და შენგენის ზონაში რუსი დიპლომატების გადაადგილებაზე კონტროლი კიდევ უფრო გაამკაცროს. ამის შესახებ ევროკავშირის უმაღლესმა წარმომადგენელმა კაია კალასმა 15 სექტემბერს ევროპარლამენტში განაცხადა.
კალასის თქმით, ევროკავშირმა უკვე შეამცირა რუსეთის დიპლომატიური წარმომადგენლობა, შენგენის ზონაში გადაადგილებისთვის ახალი მოთხოვნები შემოიღო და ევროკავშირში რუსეთის მისიის თანამშრომელთა რაოდენობა 40-მდე შეზღუდა. მან ასევე აღნიშნა, რომ უნგრეთმა 10 რუსი დიპლომატი გააძევა.
„შეგვიძლია კიდევ უფრო გავამკაცროთ შენგენის ზონის ფარგლებში რუსი დიპლომატების გადაადგილების კონტროლი, ავკრძალოთ ვიზების გაცემა რუსეთის ყოფილ მებრძოლებზე და გადავხედოთ რუსეთის მოქალაქეებისთვის ტურისტული ვიზების გაცემის პრაქტიკას“, — განაცხადა კალასმა.
ევროკავშირის უმაღლესი წარმომადგენელი რუსეთის დაფინანსების წყაროების შემცირების აუცილებლობასაც შეეხო. მისი განცხადებით, ევროკავშირის სანქციებმა რუსეთის ეკონომიკას უკვე ერთი ტრილიონი ევრო დააკარგვინა, ხოლო ბრიუსელი ამჟამად სანქციების ფარგლებში დღემდე ყველაზე ფართო სიაზე მუშაობს.
კალასის თქმით, ევროკავშირი აგრძელებს რუსეთის ე.წ. „ჩრდილოვანი ფლოტის“ წინააღმდეგ მოქმედებასაც, მათ შორის საეჭვო გემების შემოწმებისა და მათი სხვა ქვეყნების დროშებით სარგებლობის შეზღუდვის მიმართულებით.
