ამის შესახებ ოქიტაშვილმა „ინტერპრესნიუსთან“ საუბრისას განაცხადა. მან კიდევ ერთხელ მოითხოვა კათოლიკოს-პატრიარქ ილია მეორის დაკრძალვის ხარჯებთან დაკავშირებული გარემოებების შესწავლა.
„ჩემი განცხადების შემდეგ საგამოძიებო უწყებიდან არავინ დამკავშირებია. მე მაქვს ის ინფორმაცია, რაც საზოგადოებამ იცის. ზუსტად ის“, – განაცხადა ოქიტაშვილმა.
მისი თქმით, საზოგადოებაში გაჩენილ კითხვებს შესაბამისმა უწყებებმა უნდა უპასუხონ და დაადგინონ, არსებობდა თუ არა დაკრძალვისთვის გამოყოფილი თანხების არამიზნობრივი ხარჯვის ფაქტები.
„იმხელა ცოდვაა, ადამიანს რომ აბრალებ უწმინდესის დაკრძალვის თანხების გაფლანგვას, საზოგადოება ამ კითხვას რომ სვამს, ვინმემ უნდა გასცეს პასუხი. მე ვსვამ კითხვას და მაინტერესებს“, – აღნიშნა მან.
ოქიტაშვილმა მკვეთრად გააკრიტიკა თინათინ რუხაძის კულტურის მინისტრობის პერიოდი და განაცხადა, რომ მისი ხელმძღვანელობის დროს კულტურის სფეროს მნიშვნელოვანი ზიანი მიადგა.
„ეს ის ადამიანი იყო, რომელმაც ქართული კულტურა გაანადგურა. მსგავსი კულტურის მინისტრი საქართველოს ისტორიას არ ახსოვს. ხელოვანები ნელ-ნელა ამოიღებენ ხმას“, – განაცხადა „კულტურის პალატის“ ხელმძღვანელმა.
ოქიტაშვილის მტკიცებით, რუხაძის მინისტრობის პერიოდში მას კულტურულ ღონისძიებებსა და ოფიციალურ შეკრებებში მონაწილეობას მიზანმიმართულად უზღუდავდნენ.
„ყველა შეკრებაზე სიიდან ვიყავი ამოღებული. ყვიროდა, რომ „ოქიტაშვილი არ დავინახო არცერთ შეკრებაზეო“. ვხედავდი, რომ ამას მარტო ვერ გაბედავდა“, – აცხადებს ოქიტაშვილი.
მან თინათინ რუხაძის პოლიტიკურ მფარველობაში მამუკა მდინარაძე დაადანაშაულა და განაცხადა, რომ კულტურის სფეროში მიღებულ გადაწყვეტილებებზე პასუხისმგებლობა მასაც ეკისრება.
ოქიტაშვილის თქმით, 2012 წლის პოლიტიკური ცვლილებების შემდეგ იმ ადამიანების ნაწილი, რომლებიც „ქართული ოცნების“ მხარდამჭერები იყვნენ, კულტურის სფეროში მიმდინარე პროცესებს ჩამოაშორეს.
მან რუხაძის წარსულ საქმიანობასთან დაკავშირებითაც გამოთქვა ბრალდებები და მოითხოვა იმ გარემოებების შესწავლა, რომლებიც, მისი მტკიცებით, თეატრიდან მის გათავისუფლებასა და ფინანსურ საკითხებს უკავშირდება.
„ძალიან მინდა, რომ საგამოძიებო უწყებიდან დამიკავშირდნენ. მივიდე და ვუთხრა ის, რაც ვიცი. თქვენი მეშვეობით დავსვი შეკითხვები. წავიდნენ და შეამოწმონ“, – განაცხადა ოქიტაშვილმა.
შეგახსენებთ, დავით ოქიტაშვილმა 14 ოქტომბერს სოციალურ ქსელში გამოაქვეყნა განცხადება, რომლითაც პროკურატურას მიმართა და კათოლიკოს-პატრიარქ ილია მეორის დაკრძალვის ხარჯების შესწავლისკენ მოუწოდა.
ოქიტაშვილის მიერ თინათინ რუხაძისა და სხვა პირების მისამართით გამოთქმული ბრალდებები ამ ეტაპზე წარმოდგენილ ინფორმაციაში დოკუმენტური მტკიცებულებებით არ არის გამყარებული. თავად ოქიტაშვილიც აცხადებს, რომ მის ხელთ არსებული ინფორმაცია საზოგადოებისთვის ცნობილ ცნობებს არ სცდება.
თინათინ რუხაძისა და მამუკა მდინარაძის პოზიცია აღნიშნულ ბრალდებებთან დაკავშირებით გავრცელებულ მასალაში წარმოდგენილი არ არის.
წყარო: „ინტერპრესნიუსი“
