ამის შესახებ ნათქვამია ევროპული საბჭოს სამიტის პირველი დღის დასრულების შემდეგ, 16 ოქტომბერს გამოქვეყნებულ დასკვნებში.
დოკუმენტის თანახმად, გრანადის დეკლარაციის გათვალისწინებით, ევროკავშირის ლიდერებმა გაფართოების პროცესისა და გაერთიანების შიდა რეფორმების შემდგომ ნაბიჯებზე სტრატეგიული დისკუსია გამართეს.
ევროპული საბჭო აღნიშნავს, რომ გაფართოება კვლავ წარმოადგენს გეოსტრატეგიულ ინვესტიციას ევროპის მშვიდობაში, უსაფრთხოებაში, სტაბილურობასა და კეთილდღეობაში.
ამასთან, საბჭოს შეფასებით, ახალი წევრების მისაღებად მზად უნდა იყვნენ როგორც კანდიდატი სახელმწიფოები, ისე თავად ევროკავშირი.
„გაფართოებული კავშირის პერსპექტივის გათვალისწინებით, როგორც მომავალი წევრი სახელმწიფოები, ასევე ევროკავშირი მზად უნდა იყვნენ გაწევრიანების დროს. წევრობის მსურველმა ქვეყნებმა უნდა გააგრძელონ რეფორმების განხორციელება, განსაკუთრებით კანონის უზენაესობის სფეროში, გაწევრიანების პროცესის დამსახურებაზე დაფუძნებული ბუნების შესაბამისად და ევროკავშირის დახმარებით“, – აღნიშნულია დასკვნებში.
დოკუმენტის მიხედვით, კანდიდატი ქვეყნების რეფორმების პარალელურად, ევროკავშირმაც უნდა გააგრძელოს შიდა ცვლილებები, განსაზღვროს გრძელვადიანი მიზნები და მოამზადოს ინსტიტუციური და პოლიტიკური მექანიზმები გაფართოებული გაერთიანების ეფექტიანი ფუნქციონირებისთვის.
ევროპული საბჭო მიიჩნევს, რომ ამ მიმართულებით მუშაობა ევროკავშირის გაძლიერებასა და ევროპული სუვერენიტეტის განმტკიცებას შეუწყობს ხელს.
განსაკუთრებული ყურადღება ეთმობა გაწევრიანების პროცესის დამსახურებაზე დაფუძნებულ პრინციპს. ევროპული საბჭო განმარტავს, რომ თითოეული კანდიდატი ქვეყანა მოლაპარაკებებში წინ საკუთარი ინდივიდუალური პროგრესის შესაბამისად წაიწევს.
ეს ნიშნავს, რომ კანდიდატის სტატუსი თავისთავად არ უზრუნველყოფს გაწევრიანების პროცესში შემდგომ წინსვლას და გადამწყვეტი მნიშვნელობა ექნება ევროკავშირის მოთხოვნების შესრულებას, განსაკუთრებით კანონის უზენაესობის მიმართულებით.
დასკვნებში ასევე აღნიშნულია, რომ ევროპული საბჭო მიესალმება მონტენეგროსთან ევროკავშირში გაწევრიანების ხელშეკრულების მომზადების მიმართულებით მიმდინარე მუშაობას.
გამოქვეყნებულ მონაკვეთში საქართველო ცალკე არ არის ნახსენები. შესაბამისად, დოკუმენტის ეს ნაწილი საქართველოს გაწევრიანების პროცესთან დაკავშირებით ახალ, ინდივიდუალურ გადაწყვეტილებას არ შეიცავს.
წყარო: ევროპული საბჭოს 16 ოქტომბრის დასკვნები
