ირანის ოპოზიციის ლიდერის, პრინც რეზა ფეჰლევის მიმართვა ირანის ხალხს:
ძვირფასო თანამემამულენო,
ჩვენ წინაშე დგას ბედისწერის განმსაზღვრელი მომენტები. დახმარება, რომელიც შეერთებული შტატების პრეზიდენტმა ირანის მამაც ხალხს აღუთქვა, უკვე მოვიდა. ეს არის ჰუმანიტარული ჩარევა და მისი მიზანია ისლამური რესპუბლიკა, მისი რეპრესიული აპარატი და მკვლელობის მანქანა — და არა ირანის დიდი ქვეყანა და ხალხი.
თუმცა, მიუხედავად ამ დახმარებისა, საბოლოო გამარჯვებას ჩვენ თავად მივაღწევთ. სწორედ ირანის ხალხი დაასრულებს ამ ბოლო ბრძოლას. ქუჩებში დაბრუნების დრო ახლოვდება.
ახლა, როდესაც ისლამური რესპუბლიკა დაშლის ზღვარზეა, ჩემი გზავნილი ქვეყნის შეიარაღებულ ძალებს, პოლიციასა და უსაფრთხოების სტრუქტურებს ნათელია:
თქვენ დადეთ ფიცი, რომ დაიცავდით ირანს და ირანის ხალხს, და არა ისლამურ რესპუბლიკასა და მის მეთაურებს. თქვენი მოვალეობაა დაიცვათ ხალხი და არა რეჟიმი, რომელმაც რეპრესიებითა და დანაშაულებით ჩვენი სამშობლო მძევლად აიყვანა. შეუერთდით ხალხს და დაეხმარეთ სტაბილური და უსაფრთხო გარდამავალი პერიოდის უზრუნველყოფაში. წინააღმდეგ შემთხვევაში, ჩაიძირებით ხამენეისა და მისი რეჟიმის დამსხვრეულ ხომალდთან ერთად.
და ჩემი გზავნილი შეერთებული შტატების პრეზიდენტს, პრეზიდენტ ტრამპს:
ირანის ღირსეულმა ხალხმა, რეჟიმის მხრიდან სასტიკი რეპრესიებისა და მკვლელობების მიუხედავად, თითქმის ორი თვის განმავლობაში მამაცურად იბრძოლა. ახლა გთხოვთ, გამოიჩინოთ მაქსიმალური სიფრთხილე მშვიდობიანი მოქალაქეებისა და ჩემი თანამემამულეების სიცოცხლის დასაცავად. ირანის ხალხი აშშ-ისა და თავისუფალი მსოფლიოს ბუნებრივი მოკავშირეა და არასოდეს დაივიწყებს თქვენს დახმარებას ირანის თანამედროვე ისტორიის ყველაზე მძიმე პერიოდში.
და თქვენ, ჩემო ძვირფასო თანამემამულენო ირანში:
ამ მგრძნობიარე საათებსა და დღეებში ჩვენ როგორც არასდროს უნდა ვიყოთ კონცენტრირებულნი ჩვენს საბოლოო მიზანზე — ირანის დაბრუნებაზე.
გთხოვთ, ამ ეტაპზე დარჩეთ თქვენს სახლებში და შეინარჩუნეთ სიმშვიდე და უსაფრთხოება. იყავით ფხიზლად და მზად, რათა შესაბამის მომენტში, რომლის შესახებაც ზუსტად შეგატყობინებთ, დაბრუნდეთ ქუჩებში გადამწყვეტი მოქმედებებისთვის.
ადევნეთ თვალი ჩემს განცხადებებს სოციალურ ქსელებსა და სატელიტურ მედიაში. თუ ინტერნეტი და სატელიტური კავშირი შეწყდება, რადიოტალღების საშუალებით დაგიკავშირდებით.
ჩვენ ძალიან ახლოს ვართ საბოლოო გამარჯვებასთან. მსურს, რაც შეიძლება მალე ვიყო თქვენთან ერთად, რათა ერთად დავიბრუნოთ ირანი და თავიდან ავაშენოთ იგი.
გაუმარჯოს ირანს,
რეზა ფეჰლევი
