აშშ-ის საზღვაო ძალების ადმირალმა ბრედ კუპერმა, რომელიც აშშ-ის ცენტრალური სარდლობის მეთაურის რანგში ახლო აღმოსავლეთში აშშ-ის ძალებს ხელმძღვანელობს, პრეზიდენტ დონალდ ტრამპს ირანში შესაძლო სამხედრო ვარიანტების შესახებ ინფორმაცია მიაწოდა, - ABC News-ის ცნობით, ამის შესახებ პრეზიდენტთან დაახლოებულმა პირმა განაცხადა.
გამოცემა კიდევ ერთ წყაროზე დაყრდნობით იუწყება, რომ კუპერის გარდა, შეხვედრას ასევე ესწრებოდა გაერთიანებული შტაბების ხელმძღვანელი და ტრამპის მთავარი სამხედრო მრჩეველი დენ კეინი.
წყაროებმა ABC News-ს განუცხადეს, რომ ტრამპის ვარიანტებს შორისაა ბალისტიკური რაკეტების გამშვებ ადგილებსა და ბირთვულ ობიექტებზე შეზღუდული დარტყმა, როგორც ერთგვარი გაფრთხილება, რათა, ამ გზით, თეირანი აიძულონ, ტრამპის მოთხოვნებს დასთანხმდეს. ასევე განიხილება მასშტაბური ოპერაცია, რომელიც ხანგრძლივი პერიოდის განმავლობაში დიდი რაოდენობით სამიზნეებზე დარტყმებს ითვალისწინებს.
გარდა ამისა, მათ აღნიშნეს, რომ ბოლო დღეებში რამდენიმე „რესპუბლიკელმა“ და ტრამპის ადმინისტრაციის ზოგიერთმა თანამდებობის პირმა პირადად მოუწოდა ისრაელს, რომ ირანზე დარტყმის ინიციატივა თავად აიღოს, აშშ-ის მიერ სამხედრო მოქმედებების დაწყების ნაცვლად.
წყაროების მტკიცებით, თუ ასეთი სცენარი განვითარდება, ისრაელის ხელმძღვანელობით ირანის სამიზნეებზე პირველი დარტყმა არა მხოლოდ დიპლომატიური იძულების ფორმას წარმოადგენს, არამედ ასეთმა დარტყმებმა ასევე შეიძლება მწყობრიდან გამოიყვანოს ირანის საჰაერო თავდაცვის დიდი ნაწილი, თუ ტრამპი გადაწყვეტს რეჟიმის დამხობის მიზნით გაცილებით ხანგრძლივი სამხედრო კამპანიის გაგრძელებას.
ანალიტიკოსების თქმით, ასეთი ოპერაცია შეიძლება კვირების განმავლობაში გაგრძელდეს და უკიდურესად სარისკო იყოს იმის გარანტიის გარეშე, რომ ირანში აშშ-ის ინტერესებისთვის უფრო ხელსაყრელი მთავრობა ჩამოყალიბდება.
