აშშ-ში მოსალოდნელი ზამთრის შტორმის გამო, რამდენიმე შტატში საგანგებო მდგომარეობა გამოცხადდა, ნიუ იორკში ყველა სკოლა დაიხურა, აკრძალულია ტრანსპორტის მოძრაობა, გაუქმებულია ფრენები, – ამის შესახებ „ბიბისი“ წერს.
საგანგებო მდგომარეობა გამოაცხადეს კონექტიკუტმა, დელავერმა, ნიუ ჯერსიმ და როდ აილენდმა. დაახლოებით 35 მილიონი ადამიანი ზამთრის შტორმის გაფრთხილების ზონაშია.
კვირის მონაცემებით, 3 500-ზე მეტი ფრენა გაუქმდა, ასობით კი შეფერხდა. ნიუ იორკის მერმა, ზოჰრან მამდანიმ კვირას, ადგილობრივი დროით 21:00 საათიდან ორშაბათს 12:00 საათამდე სრული სატრანსპორტო აკრძალვა გამოაცხადა. დახურულია სკოლები, ყველა ქუჩა, გზატკეცილი და ხიდი ჩაკეტილია. მამდანიმ ასევე განაცხადა, რომ ზოგიერთ ადგილას 70 სანტიმეტრამდე თოვლის მოსვლაა მოსალოდნელი.
ნიუ ჯერსის გუბერნატორმა, მიკი შერილმა საგანგებო მდგომარეობა გამოაცხადა და ავტობუსებისა და მეტროს მუშაობა შეაჩერა. მისი განცხადებით, „ეს შეიძლება, ყველაზე მძიმე ქარიშხალი იყოს 1996 წლის შემდეგ“.
