ვალერი გელბახიანი - ელისო კილაძემ მითხრა, რომ მოითხოვს განმეორებით ექსპერტიზას, მიაჩნია, რომ დასკვნა არასწორია ან ხელოვნური ინტელექტით არის შექმნილი

ე.წ. ქოლ-ცენტრების საქმეზე ბრალდებული ჟურნალისტის, ელისო კილაძის ადვოკატი აცხადებს, რომ დაცვის მხარეს საქმის მასალების სრულყოფილად შესწავლის შესაძლებლობა არ მიეცა.

გელბახიანის ინფორმაციით, ელისო კილაძე სასამართლოში სიტყვით გამოსვლას აპირებს.

ადვოკატის თქმით, კილაძე არ ეთანხმება საქმეში წარმოდგენილ ექსპერტიზის დასკვნას და გეგმავს განმეორებითი ექსპერტიზის მოთხოვნას.

მისი შეფასებით, არსებული დასკვნა ან არასწორია, ან ხელოვნური ინტელექტის გამოყენებითაა შექმნილი.

ადვოკატის განცხადებით, კილაძე თავს გარკვეული მიზნების გამო მსხვერპლად მიიჩნევს.

“ძალიან ცუდია, რომ არ მოგვეცა დრო იმისთვის, რომ შეგვესწავლა ერთი ტომი მაინც. არ ვიცი სპეციალურად მოხდა თუ არა, მაგრამ ფაქტის წინაშე ვართ. ჩვენ სასამართლოს ხვალ ველოდით. ამიტომ, მთელი ღამე ვაპირებდით გვემუშავა, რათა ჩამოვყალიბებულიყავით.

ელისომ გუშინ მითხრა, რომ სასამართლოში სიტყვით უნდა გამოსვლა. ექსპერტიზის დასკვნაზე მითხრა, რომ მოითხოვს განმეორებით ექსპერტიზას. მიაჩნია, რომ ეს არის ან არასწორი დასკვნა ან ხელოვნური ინტელექტით არის შექმნილი.

ბრალდებას, რა თქმა უნდა, არ ეთანხმება. მიაჩნია, რომ ბრალდება ხელოვნურია და არის მსხვერპლი გარკვეული მიზნების გამო. ამ მიზეზებზე ვერ ვისაუბრებ, თავად ისაუბრებს”,- განაცხადა გელბახიანმა.

ინფორმაციისთვის, საქმე ეხება ორგანიზებული ჯგუფის მიერ თაღლითობასა და ფულის გათეთრებას.