სოხუმის სახელმწიფო უნივერსიტეტის სტუდენტთა კვოტა თითქმის 3-ჯერ შემცირდა - რა პროგრამები რჩება
13.02.2026 ნახვები: 217
სოხუმის სახელმწიფო უნივერსიტეტი 2026-2027 სასწავლო წელს, საბაკალავრო პროგრამებზე მხოლოდ 380 სტუდენტის მიღებას შეძლებს, რაც დაახლოებით 3-ჯერ ნაკლებია გასული წლის მისაღები სტუდენტების ადგილების რაოდენობაზე. მთავრობამ უმაღლეს საგანმანათლებლო დაწესებულებებში მისაღები სტუდენტების კვოტების შესახებ დადგენილება უკვე გამოაქვეყნა.
აღსანიშნავია, რომ გასულ წელს, სოხუმის სახელმწიფო უნივერსიტეტში მისაღებ სტუდენტთა კვოტა 1027 იყო, თუმცა ჩაირიცხა 778 სტუდენტი.
მთავრობის დადგენილების მიხედვით, სოხუმის უნივერსიტეტი სტუდენტების მიღებას მხოლოდ ქართულ-აფხაზური ენის და ლიტერატურისა და პედაგოგიკის სპეციალობებზე, და ასევე აგრარულ სპეციალობებზე შეძლებს. ცნობისთვის, აგრარული პროგრამები სოხუმის უნივერსიტეტს ამ დრომდე არ ჰქონია და ახლა დაემატება.
"სოხუმის უნივერსიტეტს საერთოდ არ აქვს აგრარული მიმართულება და ჰაერიდან უნდა გააჩინოს?" - ნანა დიხამინჯია
სამაგიეროდ, სოხუმის უნივერსიტეტი ვეღარ მიიღებს სტუდენტებს ისეთ პროგრამებზე, როგორიცაა, სამართალი, საერთაშორისო ურთიერთობები, პოლიტიკის მეცნიერებები, ფსიქოლოგია, სოციოლოგია, ბიზნესის ადმინისტრირება, ეკონომიკა, არქეოლოგია, ბიოსამედიცინო ინჟინერია და სხვა.
სოხუმის უნივერსიტეტის საბაკალავრო პროგრამები და მისაღებთა რაოდენობა 2026-2027 სასწავლო წლისთვის
| აფხაზური ფილოლოგია | 20 |
| კომპიუტერული ტექნოლოგიები (მასწავლებლის ერთწლიანი მომზადების პროგრამის ინტეგრირებით) | 30 |
| ქიმია (მასწავლებლის ერთწლიანი მომზადების პროგრამის ინტეგრირებით) | 30 |
| გეოგრაფია (მასწავლებლის ერთწლიანი მომზადების პროგრამის ინტეგრირებით) | 30 |
| ქართული ფილოლოგია (მასწავლებლის ერთწლიანი მომზადების პროგრამის ინტეგრირებით) | 30 |
| ინგლისური ფილოლოგია (მასწავლებლის ერთწლიანი მომზადების პროგრამის ინტეგრირებით) | 30 |
| გერმანული ფილოლოგია (მასწავლებლის ერთწლიანი მომზადების პროგრამის ინტეგრირებით) | 30 |
| ისტორია (მასწავლებლის ერთწლიანი მომზადების პროგრამის ინტეგრირებით) | 30 |
| რუსული ფილოლოგია (მასწავლებლის ერთწლიანი მომზადების პროგრამის ინტეგრირებით) | 30 |
| მათემატიკა (მასწავლებლის ერთწლიანი მომზადების პროგრამის ინტეგრირებით) | 30 |
| ფიზიკა (მასწავლებლის ერთწლიანი მომზადების პროგრამის ინტეგრირებით) | 30 |
| ბიოლოგია (მასწავლებლის ერთწლიანი მომზადების პროგრამის ინტეგრირებით) | 30 |
| სკოლამდელი განათლება | 30 |
