ტარიფის გაანგარიშების დროს მეთოდოლოგია არ ითვალისწინებს ცხოვრების დონეს საარსებო მინიმუმს და სხვადასხვა სოციალური პარამეტრის გათვალისწინებას - ამის შესახებ ენერგეტიკისა და წყალმომარაგების მარეგულირებელი კომისიის თავმჯდომარემ დავით ნარმანიამ ჟურნალისტებს, ელექტროენერგიის ტარიფზე საუბრისას განუცხადა.
მისი თქმით, ეს არის სოციალური პოლიტიკის შემადგენელი ნაწილი და არა სატარიფო.
„ტარიფის გაანგარიშების დროს მეთოდოლოგია არ ითვალისწინებს ცხოვრების დონეს, საარსებო მინიმუმს და სხვადასხვა სოციალური პარამეტრის გათვალისწინებას. ეს არის მთავრობის პრეროგატივა და იცით, რომ მთავრობა 2015 წლიდან მოყოლებული ტარიფის ყოველ ნაზარდს უსუფსიდირებს იმ მოსახლეობას, რომელთა ოჯახის სარეიტინგო ქულა 70 000-ზე ნაკლებია. შესაბამისად, ეს არის სოციალური პოლიტიკის შემადგენელი ნაწილი და არა სატარიფო“, - განაცხადა ნარმანიამ.
კითხვაზე, „ვინც არ არის სოციალურად დაუცველი, მას არ დააწვება ტარიფის მატება?“ ნარმანიამ უპასუხა, რომ ტარიფის მატება პირველ რიგში სოციალურად დაუცველებს აწვებათ.
რაც შეეხება სხვა კატეგორიის მომხმარებლებს, ნარმანიას თქმით, როცა ტარიფი იზრდება, ყველას ეზრდება კომუნალური ხარჯი, მაგრამ გასათვალისწინებელია ისიც, რომ 2 წლის წინ 3 თეთრით ტარიფები შემცირდა და მომხმარებლებს ამ პერიოდში მდგომარეობა გაუუმჯობესდათ.
„ტარიფის მატება პირველ რიგში აწვებათ სოციალურად დაუცველებს და სწორედ ამიტომ არის შესაბამისი სუბსიდირების პოლიტიკა გათვალისწინებული. რაც შეეხება სხვა კატეგორიის მომხმარებლებს, როცა ტარიფი იზრდება, რა თქმა უნდა, ყველას ეზრდება კომუნალური ხარჯი, მაგრამ გასათვალისწინებელია ისიც, რომ 2 წლის წინ ჩვენ 3 თეთრით ტარიფები შევამცირეთ და მომხმარებლებს ამ პერიოდში მდგომარეობა გაუუმჯობესდა“, - განაცხადა ნარმანიამ.
ცნობისთვის, ელექტროენერგიის სამომხმარებლო ტარიფთან დაკავშირებული ცვლილებები სამი თვით გადავადდა.
აღნიშნული გადაწყვეტილება საქართველოს ენერგეტიკისა და წყალმომარაგების მარეგულირებელმა კომისიამ სხდომაზე გამოაცხადა.
