მოსამართლემ 4 ოქტომბერს განვითარებულ მოვლენებთან დაკავშირებით ბრალდებული კიდევ 12 პირის მიმართ შეფარდებული პატიმრობა ძალაში დატოვა
27.11.2025 ნახვები: 233
თბილისის საქალაქო სასამართლომ ათონელის სასახლესთან, 4 ოქტომბერს განვითარებულ მოვლენებთან დაკავშირებით დაკავებულ 12 პირის მიმართ შეფარდებული აღკვეთის ღონისძიება პატიმრობა ძალაში დატოვა.
ამით მოსამართლე მეია მელქაძემ პროკურატურის შუამდგომლობა დააკმაყოფილა.
ბრალდების მხარემ პატიმრობის ძალაში დატოვების შუამდგომლობით მიმართა სასამართლოს, მოტივად მიმალვის და ახალი დანაშაულის საფრთხეები დაასახელა.
დაცვის მხარე არ იზიარებდა პროკურატურის აღნიშნულ პოზიციას და ამტკიცებდა, რომ დანაშაულის დასადგენად საქმეში შესაბამისი მტკიცებულება არ არსებობს. ადვოკატების თქმით, არ არსებობს მტკიცებულება, რითაც ბრალდებულთა ერთმანეთთან კავშირი, შეთანხმება და ჯგუფურად მოქმედება დგინდება. დაცვის მხარემ სასამართლოს მკაცრი აღკვეთის ღონისძიება პატიმრობის ნაკლებად მსუბუქის, გირაოთი შეცვლის შუამდგომლობით მიმართა. გირაოს ოდენობად კი ნაწილის მიმართ 5 000 ლარი დასახელდა, ნაწილმა კი გირაოს ოდენობის განსაზღვრება სასამართლოს მიანდო.
15 000 - 15 000 ლარის ოდენობით გირაო დაასახელეს თემურ ქურციკიძის და გიორგი მუმლაძის ადვოკატმა.
ცნობისთვის, ბექა ქელეხსაშვილს, მამუკა ლაბუჩიძეს, გურიელა ქარდავას, ვახტანგ ფიცხელაურს, ალექსანდრე ხაბეიშვილს, აბო ნავერიანს, ანტონ უპერს, ავთანდილ სურმანიძეს, გიორგი მულაძეს და თემურ ქურციკიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად.
მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.
მარიამ მეყანწიშვილს ბრალდება სსსკ-ის 226-ე მუხლით აქვს წარდგენილი, რაც ჯგუფური მოქმედების ორგანიზებას გულისხმობს.
ნანა სანდერს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს და სასჯელის ზომად 6-დან 9- წლამდე თავისუფლების აღკვეთას ითვალისწინებს. მას ბრალდება ასევე წარდგენილი აქვს სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9 -წლამდე თავისუფლების აღკვეთას ითვალისწინებს.
