გერმანიის საგარეო საქმეთა მინისტრი - გვაქვს პასუხისმგებლობა, რომ ომი მესამე მსოფლიო ომში არ გადაიზარდოს

დაუშვებელია, რომ უკრაინაში მიმდინარე ომი მესამე მსოფლიო ომში გადაიზარდოს. გერმანია მხარს უჭერს ნატო-ს გადაწყვეტილებას, არ დახუროს უკრაინის ცა, - ამის შესახებ გერმანიის საგარეო საქმეთა მინისტრმა, ანალენა ბერბოკმა განაცხადა.

„ეს რომ ასე იოლი ყოფილიყო, მაშინ გამოსავალს მალევე ვიპოვიდით, დღესვე. ჩვენ რომ შეგვეძლოს ამ ომის შეჩერება, დედების ტანჯვის შეჩერება, მამების, ბავშვების ტანჯვის შეჩერება რომ შეგვეძლოს, ამას დაუყოვნებლივ გავაკეთებდით. მაგრამ ჩვენ გვაქვს პასუხისმგებლობა, რომ ეს ომი მესამე მსოფლიო ომში არ გადაიზარდოს", - განაცხადა ბერბკომ და დასძინა, „პუტინი არღვევს ყველა საერთაშორისო წესს, ხოლო დასავლეთმა აამოქმედა ეკონომიკური და ფინანსური საშუალებები და ბერკეტები, რათა რუსეთის პრეზიდენტზე მაქსიმალური ზეწოლა მოახდინოს".

4 მარტს ნატო-ს გენერალურმა მდივანმა, იენს სტოლტენბერგმა განაცხადა, რომ ალიანსის წევრი ქვეყნები ერთიანობას ინარჩუნებენ და მათი პოზიციაა, რომ ნატო-ს თვითმფრინავები არ უზრუნველყოფენ უკრაინის საჰაერო სივრცის დახურვას.