თქვენ ახლა აღიარეთ, არჩევნებში რომ დაიხარჯება შავი ფული პოლიტიკური მიზნებისთვის, ამის გამომჟღავნება არ გინდათ ყველაზე მეტად, – ასე მიმართა საპარლამენტო უმრავლესობის ლიდერმა, მამუკა მდინარაძემ „ნაციონალური მოძრაობის“ თავმჯდომარე ლევან ხაბეიშვილს იურიდიულ საკითხთა კომიტეტის სხდომაზე, სადაც „უცხოური გავლენის გამჭვირვალობის შესახებ“ კანონპროექტის პირველი მოსმენით განხილვა მიმდინარეობს.
მდინარაძის თქმით, გაუგებარია, რატომ ნერვიულობს ოპოზიცია, თუ მათივე მკიცებით, რამდენიმე თვეში ხელისუფლებაში „ქართული ოცნება“ აღარ იქნება და კანონის შეცვლასაც შეძლებენ.
„ბატონო ლევან, ჩემი აზრით, თქვენ ახლა აღიარეთ, რომ არჩევნებში რომ დაიხარჯება შავი ფული პოლიტიკური მიზნებისათვის, ამის გამომჟღავნება არ გინდათ ყველაზე მეტად. ამიტომ მოგვიწოდებთ, არჩევნების შემდეგ გადადეთო კანონპროექტის განხილვა. იმავე ლოგიკით მეც მოგიწოდებთ, რაღას ნერვიულობთ მაშინ, ამ ხალხს რაღას ატყუებთ, თქვენ რომ გკითხოთ კაცმა, ხუთ თვეში და ექვს თვეში აღარ ვიქნებით ხელისუფლებაში და შეცვალეთ ეს კანონი“, – განაცხადა მამუკა მდინარაძემ.
