შალვა პაპუაშვილი - სახელმწიფო ვერ გაატარებს მოსამართლეებსა და მათი ოჯახის წევრებზე მორალურ ტერორს

სახელმწიფო ვერ გაატარებს მოსამართლეებსა და მათი ოჯახის წევრებზე მორალურ ტერორს. სათანადო პასუხი თუ არ გავეცით, შემდეგი იქნება საქართველოს ნებისმიერი მოქალაქე, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

შალვა პაპუაშვილს მოსამართლეებთან დაკავშირებით დედაქალაქის ქუჩებში გაკეთებულ წარწერებზე დაუსვეს კითხვა.

პაპუაშვილის თქმით, მოსამართლეების წინააღმდეგ „ნაციონალური მოძრაობის“ და რამდენიმე „ენჯეოს“ ერთობლივი კამპანია მიმდინარეობს.

„ვხედავთ და გამოჩნდა კიდეც, რომ ეს არის „ნაციონალური მოძრაობის“ და რამდენიმე „ენჯეოს“ ერთობლივი კამპანია. სამწუხაროა, რომ ამაში იხარჯება გარკვეული ფული, მათ შორის უცხოური, რათა მოხდეს ქართული მართლმსაჯულების დისკრედიტაცია. სამწუხაროა, რომ რამდენიმე „ენჯეოს“ წყალობით, დღესდღეობით, მართლმსაჯულების სფეროში უცხოური მონაწილეობა გაიგივებულია სასამართლოზე თავდასხმასთან, მოსამართლეების მიმართ მორალურ ტერორთან და მათი ოჯახის წევრების მიმართ მორალურ ზეწოლასთან. გუშინ მოსამართლე ჩხიკვაძისგან მოვისმინეთ კიდეც, რომ მისი ოჯახის წევრები და შვილიც ამის გამო დაზიანებული არიან. სხვადასხვა ჯგუფები, აქტორები შიგნით თუ გარეთ როდესაც გამოდიან, სემინარების ენით გვესაუბრებიან უფლებებსა და სტანდარტებზე, აი, დაირღვა ბავშვის უფლება, დაირღვა სტანდარტი და ახლა სად არიან ის პირები, რომლებიც ამაზე არიან პასუხისმგებლები. სად არიან ისინი, უცხოელი დიპლომატები და ენჯეოები, რომლებმაც თავის დროზე ეს კამპანია წაახალისეს, სად არის ბოდიში ამ ადამიანისა და მისი შვილის მიმართ. ამიტომ, ეს საქმე ასე არ ჩაივლის, ვერავინ მიაჩუმათებს. ქართული სახელმწიფო ვერ გაატარებს იმას, რომ უსამართლო მორალური ტერორი მოხდა მოსამართლეზე, ასევე მის ოჯახის წევრებზე. ამას ჩვენ სათანადო პასუხი თუ არ გავეცით, სათანადო რეაგირება თუ არ იყო მათი მხრიდან, ვინც ეს კამპანია წაახალისა, შემდეგი იქნება საქართველოს ნებისმიერი მოქალაქე, რომელიც შეიძლება, ასე დაზიანდეს“, – განაცხადა შალვა პაპუაშვილმა.