რუმინეთი და ბულგარეთი შენგენის ზონას შეუერთდებიან

31 მარტიდან რუმინეთი და ბულგარეთი შენგენის ზონას შეუერთდებიან. ამგვარად, ორივე ქვეყანაზე შენგენის წესები გავრცელდება, მათ შორის, შენგენის ვიზების გაცემასთან დაკავშირებით, გაუქმდება შიდა საჰაერო და საზღვაო საზღვრებზე კონტროლი.

ამასთან, ევროკავშირის საბჭომ ჯერ კიდევ უნდა შეათანხმოს თარიღი, რომლიდანაც გაუქმდება შემოწმება ბულგარეთს, რუმინეთსა და შენგენის ზონის სხვა ქვეყნებს შორის შიდა სახმელეთო საზღვრებზე. ევროკომისიის განცხადებებით, ის გააგრძელებს ევროკავშირის საბჭოს მხარდაჭერას, რომ ეს გადაწყვეტილება მიმდინარე წელს იყოს მიღებული.

ევროკომისიის განცხადებით, ამ ორი სახელმწიფოს შენგენის ზონაში გაწევრიანება აღნიშნულ საერთო სივრცეს უფრო მიმზიდველს გახდის.

„მნიშვნელოვანი დღეა: ბულგარეთი და რუმინეთი უერთდებიან შენგენის ოჯახს, მივესალმები შიდა საჰაერო და საზღვაო საზღვარზე შემოწმების გაუქმებას. ეს არის დიდი წარმატება ორივე ქვეყნისთვის. ეს არის ისტორიული მომენტი შენგენის ზონისთვის, მსოფლიოში თავისუფალი გადაადგილების უდიდესი სივრცისთვის. ერთად ჩვენ ვაშენებთ უფრო ძლიერ, უფრო ერთიან ევროპას ყველა ჩვენი მოქალაქისთვის“, – აღნიშნა ევროკომისიის პრეზიდენტმა, ურსულა ფონ დერ ლაიენმა.

ბულგარეთისა და რუმინეთის შენგენის ზონაში გაწევრიანების გადაწყვეტილება ევროკავშირის საბჭომ დეკემბერში გამართულ სამიტზე მიიღო.

ევროკომისიის განცხადებით, რუმინეთი და ბულგარეთი მუდმივად ადასტურებენ ევროკავშირის გარე საზღვრების ადეკვატური დაცვის უზრუნველყოფისადმი ერთგულებას და ხელს უწყობენ შენგენის ზონის შიდა უსაფრთხოებას.