კვარაცხელია „ნაპოლი“ - „იუვენტუსის“ მატჩის საუკეთესო მოთამაშედ დაასახელეს

ხვიჩა კვარაცხელია იტალიის ჩემპიონატის ბოლო ტურში „ნაპოლი“ – „იუვენტუსის“ მატჩის საუკეთესო მოთამაშედ (MVP) დაასახელეს.

ერთდროულად ორმა ანალიტიკურმა სპორტულმა ვებგვერდმა, Flashscore-მა და Whoscored-მა ქართველს ორივე გუნდში საუკეთესო შეფასება დაუწერა – 7,7 და 8,0 ქულა (10-ბალიანი სისტემით).

ხვიჩას თამაში Sofascore-მაც დააფასა და 8,0 ქულა დაუწერა, მაგრამ ბოლო დროის ტრადიციას არ უღალატა და ქართველ თავდამსხმელს ერთპიროვნული პირველობა არ მიაკუთვნა – საუკეთესოდ „იუვენტუსის“ თავდამსხმელ ფედერიკო კიეზასთან ერთად აღიარა, რომელმაც მატჩის მიწურულს „ნაპოლის“ გაუტანა – ინტერნეტ-პორტალმა ტურინელის გრაფაშიც 8,0 ქულა დაწერა.

საქართველოს ნაკრების თავდამსხმელმა „ნაპოლი“ – „იუვენტუსის“ მატჩში ანგარიში პირველი ტაიმის ბოლო გახსნა და გუნდს მოგებაში (2:1) დაეხმარა. სულ მიმდინარე სეზონში კვარაცხელიას ანგარიშზე 9 გოლი და 4 საგოლე გადაცემაა.

1tv.ge