ბენიამინ ნეთანიაჰუ - აზრი არ აქვს ზავის შესახებ მოლაპარაკებებს, ვიდრე „ჰამასი“ თავის მოთხოვნებს არ შეცვლის

ისრაელის პრემიერ-მინისტრის, ბენიამინ ნეთანიაჰუს თქმით, აზრი არ აქვს მოლაპარაკებებს ზავის შესახებ, ვიდრე „ჰამასი“ თავის მოთხოვნებს არ შეცვლის.

„ჩვენი სამხედრო ზეწოლა მუშაობს, ჩვენ ვუახლოვდებით „ჰამასს“ ტერორიზმის დედაქალაქ ხან იუნისში. ბოლო რამდენიმე დღის განმავლობაში ჩვენ მივაღწიეთ იმ ადგილებს, რომლებსაც მტერი ვერასდროს წარმოიდგენდა, რომ მივაღწევდით. ვინც გვეუბნება, რომ „რაფაჰში“ არ ვიმოქმედოთ, ის გვეუბნება, რომ ომი წავაგოთ”, – განაცხადა ნეთანიაჰუმ.

ბენიამინ ნეთანიაჰუმ, ჟურნალისტებთან საუბრისას, აღნიშნა, რომ „რაფაჰის“ ჩრდილოეთით ბევრი თავისუფალი სივრცეა ევაკუაციისთვის, რადგან ისრაელი ხან იუნისში ოპერაციებს მალე დაასრულებს.

ისრაელის პრემიერ-მინისტრმა პალესტინასთან შეთანხმების მიღწევის გზებზეც ისაუბრა.

„პალესტინასთან შეთანხმების მიღწევა მხოლოდ მხარეებს შორის პირდაპირი მოლაპარაკებების გზითაა შესაძლებელი, წინაპირობების გარეშე”, – აღნიშნავს ბენიამინ ნეთანიაჰუ.