გადადგომის საფუძვლები გაწერილია კანონმდებლობაში, ვიცავ კონსტიტუციას - თურნავა პრეზიდენტს პასუხობს

ნათია თურნავა პრეზიდენტს პასუხობს. მას შემდეგ, რაც სალომე ზურაბიშვილმა სებ-ის დირექტორის მოვალეობის შემსრულებელს გადადგომისკენ მოუწოდა, დღეს ნათია თურნავა ამბობს, რომ სებ-იდან წასვლას არ გეგმავს. თურნავას თქმით, გადადგომის საფუძვლები კანონშია გაწერილი, ის კი იცავს კანონმდებლობას და კონსტიტუციას.

თურნავა თქმით მასზე ზეწოლა მიმდინარეობს,  რასაც ყურადღებას არ აქცევს.

"მე არ ვარ იმ პოზიციაში, რომ ვუპასუხო ქალბატონ პრეზიდენტს. ქალბატონი პრეზიდენტი არის პოლიტიკოსი, მე დიდ პატივს ვცემ პრეზიდენტის ინსტიტუტს როგორც კონსტიტუციურ ინსტიტუტს, მე თვითონაც წარმოვადგენ ეროვნულ ბანკს, როგორც კონსტიტუციურ ინსტიტუტს და არ არის ეს ჩემი მანდატი და ამოცანა, რომ შეფასება გავაკეთო ამა თუ იმ პოლიტიკოსის და მით უფრო პრეზიდენტის განცხადებაზე. მე თავს შევიკავებ.

ეროვნული ბანკის პრეზიდენტის მოვალეობის შემსრულებლის გადადგომის საფუძვლები გაწერილია ჩვენს კანონმდებლობაში. ეს არის კონსტიტუციის და კანონის დარღვევა. ამ კონკრეტულ შემთხვევაში მე ვიცავ კონსტიტუციას და საქართველოს კანონმდებლობას, ამიტომ ეს არის ზეწოლის მაგალითები, რომელსაც მე არ ვაქცევ ყურადღებას", - განაცხადა თურნავამ.