დავით უსუფაშვილი - გამიჩნდა განცდა, რომ მეორე, რაც კიდევ გასაგზავნია კოსმოსში უცხო ცივილიზაციებისთვის, საარჩევნო კოდექსია, იმის საჩვენებლად, რა ჭაობში ვფართხალებთ ეს საოცარი ხალხი

დედამიწიდან გზავნილებს შორის არის ქართული „ჩაკრულო“. 35-წლიანი საარჩევნო პრაქტიკის შემდეგ, გამიჩნდა განცდა, რომ მეორე რამ, რაც კიდევ გასაგზავნია კოსმოსში უცხო ცივილიზაციებისთვის, არის საარჩევნო კოდექსი, იმის საჩვენებლად, რა ჭაობში ვფართხალებთ ახლა ეს საოცარი ხალხი, – ამის შესახებ პოლიტიკური ჯგუფის, „ლელოს“ თავმჯდომარემ, დავით უსუფაშვილმა საარჩევნო კოდექსში შეტანილ ცვლილებებთან დაკავშირებით პრეზიდენტის მოტივირებული შენიშვნების განხილვის დროს პლენარულ სხდომაზე განაცხადა.

უსუფაშვილის თქმით, საარჩევნო კოდექსი არის სხვადასხვა ხელისუფლების დროს, სხვადასხვა კონტექსტის დროს მოფიქრებული და ერთმანეთზე ჩახლართული ამბების კომპილაცია.

„ეს ყველაფერი ეფუძნება იმას, რომ არჩევნები მოახლოვდება თუ არა, ეს გადასარევი ხალხი, „ჩაკრულოს“ შემქმნელი და არა მარტო „ჩაკრულოსი“, ვიწყებთ საოცარ ურთიერთშერკინებას – ნახევარი საქართველო მეორე ნახევარ საქართველოს დავდევთ და ვუყურებთ ერთმანეთს ჯიბეში, ხელებში, ხომ არაფერი ჩააგდო, ხომ არაფერი ამოიღო, ბიულეტენი ხომ არ დაწვა, ხომ არაფერი ჩაასწორა. ერთმანეთს ვაღიარებთ ხმების მომპარავ, გამყალბებელ, ქურდბაცაცა ადამიანებად და შემდეგ ამ პროცესიდან გვინდა, რამე კარგი გამოვიდეს. ასეთი არჩევნების გზით რომ მივიღებთ ხელისუფლებას, ოპოზიციას და პოლიტიკურ სპექტრს, გვინდა ხოლმე, რამე დადებითს დაედოს საფუძველი, ეს შეუძლებელია. ეს ვერ მოხდება, რადგან იმ ტიპის არჩევნებით, რაც ჩვენ დაგვებედა და რასაც ვატარებთ, ვშორდებით ქართულ სახელწიფოს, ვშორდებით იმას, რაც კონსტიტუციაში დიდი ასოებით გვიწერია“, – განაცხადა დავით უსუფაშვილმა.