ევროკავშირში გაწევრიანების მხარდაჭერა იზრდება, ეს აისახება არჩევნების შედეგებში - ის პარტია, რომელსაც ეს არ სურს, არ იქნება მხარდაჭერილი, - ამის შესახებ ჟურნალისტებთან ოპოზიციონერმა დეპუტატმა რომან გოცირიძემ განაცხადა.
როგორც მან აღნიშნა, პარტიების მიმართ ნდობის შემცირება, ბოლო პერიოდში განვითარებული მოვლენების ფონზე, გასაკვირი არ არის, თუმცა, ახალი პარტიები მოკლე ხანში ვერ შეიქმნება, ამიტომ ოპოზიციური ფლანგი უნდა გაჯანსაღდეს.
„ყველაზე დამაიმედებელი ის არის, რომ ევროკავშირში გაწევრიანების მხარდაჭერა იზრდება. ეს რა თქმა უნდა აისახება შემდგომ არჩევნების შედეგებში, მოქალაქეებს სურთ გაწევრიანდნენ ევროკავშირში, ის პარტია, რომელსაც ეს არ სურს, არ იქნება მხარდაჭერილი. ეს არის მთავარი ირიბი სიგნალი. პარტიების ნდობის შემცირებას რაც შეეხება, ეს არ არის გასაკვირი, ბოლო პერიოდში განვითარებული მოვლენების გათვალისწინებით როგორც ოპოზიციურ ფლანგზე, ასევე სახელისუფლებო მიმართულებით, მაგრამ როგორც არ უნდა მოგვწონდეს ეს სურათი, ერთ და ორ დღეში პარტიები ვერ გამოიჩეკებიან, ესა ვართ, რაც ვართ, ამიტომ ოპოზიციურ ფლანგზე პარტიები უნდა გაჯანსაღდნენ, თუ გვინდა, რომ გადაუწყვეტელი ამომრჩევლის ხმები მივიღოთ, რაც მოგვცემს საშუალებას, რომ შევქმნათ კოალიციური უმრავლესობა. კოალიციური უმრავლესობის და ახალი ხელისუფლების ფორმირების გარეშე საქართველოს პერსპექტივა არ აქვს, დაღუპულია ქვეყანა ხელისუფლების დარჩენის პირობებში. ეს გამოკითხვა პროევროპული პარტიების წისქვილზე ასხამს წყალს.
გამოკითხვა ყველა მნიშვნელოვან საკითხზე, მათ შორის მიხეილ სააკაშვილთან დაკავშირებით ადასტურებს ერთ ფაქტს - საქართველოს ხელისუფლების პოზიციას მხარს არ უჭერს საქართველოს მოსახლეობის უდიდესი ნაწილი. მარტივად არის საქმე - მიხეილ სააკაშვილი უნდა გადარჩეს, შეუძლებელია მოქალაქეებს, რომლებიც არიან ჰუმანურები თავის ბუნებით, სხვა პასუხი გაეცათ,"- განაცხადა გოცირიძემ.
“საერთაშორისო რესპუბლიკური ინსტიტუტის” (IRI) ახალი საზოგადოებრივი აზრის კვლევა (Center for Insights in Survey Research) აჩვენებს, რომ გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას. მხარდაჭერა, ორგანიზაციის ცნობით, წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.
ამასთან, კვლევის მიხედვით, გამოკითხულთა 42% აცხადებს, რომ არცერთი პოლიტიკური პარტია არ გამოხატავს მათ ინტერესებს. ხოლო, საზოგადოების 78% -ს პოლიტიკაში მეტი ახალგაზრდის ხილვა სურს.
