საქართველოში ახალი პოლიტიკური ძალა ყველა არჩევნების წინ იქმნება. ვიღაცა ამაში ფულს იხდის. სხვადასხვა უცნაური პარტიები ყოველთვის არსებობენ, რომლებიც წინასაარჩევნოდ რეკლამდება და გზააბნეულ ხმებზე მუშაობს, – ამის შესახებ პარტია „გირჩის“ ლიდერმა იაგო ხვიჩიამ საქართველოს პირველ არხს განუცხადა.
ხვიჩია გამოეხმაურა „ლელო – საქართველოსთვის“ ლიდერის, მამუკა ხაზარაძის ფეისბუქპოსტს, სადა ხაზარაძე ამბობს, რომ ახალი პოლიტიკის, ახალი ძალების გაერთიანების დროა.
იაგო ხვიჩიას თქმით, „ნაციონალური მოძრაობის“ ზოგიერთ წევრს „ლელოში“ სიამოვნებით იხილავდა.
„ცხადია, „ლელომ“ რაღაც გადაწყვეტილება უნდა მიიღოს, რადგან ოპოზიცია ერთიანდება, ძველი ხალხი, მათ შორის „ლელოს“ ძველი მეგობრები ერთმანეთს ეძებენ და „ლელომაც“ თავისი გზა უნდა იპოვოს ამ შენაკადში. ვფიქრობ, „ლელოს“ პოლიტიკიდან წასვლა უნდა და ამის ნიადაგს ამზადებს. თუ ასე არ არის, რაღაც თავად უნდა მოიფიქროს, რადგან ხომ ხედავთ, ხალხი ერთიანდება. „ნაციონალური მოძრაობის“ ზოგიერთ წევრს „ლელოში“ სიამოვნებით ვიხილავდი, მაგრამ ეს ჩემი გადასაწყვეტი არ არის. „ნაცმოძრაობის“ დაშლის გულშემატკივარი ვარ და წინააღმდეგი არ ვარ, „ლელო“ მოძლიერდეს. „ლელოსთან“ საერთოდ ვერ ვკომუნიცირებთ, იმდენად განსხვავებული ხალხია“, – განაცხადა იაგო ხვიჩიამ.
