გამოცემა NATION.GE (ნეიშენ ჯორჯია) და საზოგადოებრივ და პოლიტიკურ ურთიერთობათა აკადემიამ (APPR) 2022 წლის გმირი - უკრაინელი ხალხი - დაასახელა.
გადაწყვეტილება აკადემიის მრჩეველთა საბჭოსა და გამოცემის სარედაქციო ანალიტიკური კოლეგიის მიერ იქნა მიღებული. გადაწყვეტილებას საფუძვლად დაედო 2022 წლის 24 თებერვალს, რუსეთის ფედერაციის მიერ უკრაინის სახელმწიფოს წინააღმდეგ განხორციელებული საომარი აგრესიის დროს უკრაინელი ხალხის მიერ გამოჩენილი თავდადება.
როგორც აკადემიაში აცხადებენ, იმ პირობებში, როდესაც რუსეთის უკრაინაში შეჭრის შემდეგ, მსოფლიოს წამყვანი ანალიტიკური ცენტრები პროგნოზებს გამოთქვამდნენ, რომ უკრაინის დედაქალაქი სამ-ხუთ დღეში დაეცემოდა, უკრაინელმა ხალხმა და ხელისუფლებამ გამოვლინეს სრული ერთიანობა და დაუჯერებელი თავდადება.
დღეს უკვე ყველასთვის თვალნათელია, რომ უკრაინა ამ ომში არ დამარცხდება. უკრაინელი ხალხის თავდადებამ და ბრძოლისუნარიანობამ შესაძლებელი გახადა, რუსეთის იმპერიალისტური პოლიტიკის გაშიშვლება და მსოფლიოს სახელმწიფოებისა და დემოკრატიული ძალების კონსოლიდაცია კრემლის ძალადობრივი პოლიტიკის წინააღმდეგ.
სწორედ უკრაინელი ხალხის დამსახურებაა, რომ მსოფლიო თანამეგობრობამ გლობალურ კონტექსტში და ნათლად დაინახა რუსეთიდან მომდინარე საფრთხე, რაც დემოკრატიული ძალების გაერთიანების უმნიშვნელოვანესი ფაქტორი გახდა. უკრაინელი ხალხის შემართებისა და ბრძოლისუნარიონობისა და გმირობის შედეგია, რომ უკრაინის მოქალაქეების გვერდით იბრძვიან სხვადასხვა ეროვნების წარმომადგენლები და ქართველი მეომრების თავდადება ოქროს ასოებით ჩაიწერება თავისუფლებისა და დემოკრატიული ღირებულებებისათვის ბრძოლის ისტორიაში.
გამოცემა NATION.GE-ს (ნეიშენ ჯორჯია) დამფუძნებლისა და საზოგადოებრივ და პოლიტიკურ ურთიერთობათა აკადემიის (APPR) დირექტორის, გოჩა მირცხულავას განცხადებით, უკრაინის, მისი მოსახლეობის - უკრინელი ხალხის აღიარება სავსებით ესადაგება ქართველი ხალხის უმრავლესობისა და საზოგადოების განწყობას.
მასალის გამოყენებისას გთხოვთ მიუთითოთ წყარო.
ფოტო: კოლაჟი (nation.ge)
--------
