ლევან იოსელიანი - დეოლიგარქიზაციის შესახებ მმართველი გუნდის პროექტით, ოლიგარქთა რეესტრში შეიძლება მარტივად აღმოჩნდეს ადამიანი, რომელსაც არ აქვს ფული

დეოლიგარქიზაციის შესახებ მმართველი გუნდის პროექტით, ოლიგარქთა რეესტრში შეიძლება მარტივად აღმოჩნდეს ადამიანი, რომელსაც არ აქვს ფული, - ამის შესახებ "მოქალაქეების" დეპუტატმა, ვიცე-სპიკერმა ლევან იოსელიანმა განაცხადა.

მისივე თქმით, პროექტს ბევრი ხარვეზი აქვს და სავარაუდოდ, ხელისუფლება ვენეციის კომისიისგან დადებით დასკვნას ვერ მიიღებს.

„ჩემთვის არაფერი შეიცვლება იმით, ეს კანონი გაიგზავნება თუ არა ვენეციის კომისიაში, ვთვლი, რომ არ შეესაბამება ჩვენს რეალობას, ის დაწერილია უკრაინისთვის და არ ასახავს ჩვენი ქვეყნის რეალობას. ამ კანონის თანახმად, შეიძლება ადამიანი, რომელსაც არ აქვს ფული, აღმოჩნდეს მარტივად ოლიგარქთა რეესტრში და ადამიანი, რომელსაც არ აინტერესებს პოლიტიკა, მაგრამ თავის შრომით აქვს დაგროვილი რაღაც კაპიტალი, ისიც აღმოჩნდეს ოლიგარქთა რეესტრში. ამიტომ ამ კანონს აქვს ბევრი ხარვეზი. თვითონვე "ქართული ოცნება" ამ კანონს უწოდებს სულელურ კანონს, მაგრამ მეორე შემთხვევაა, როცა არ მოსწონთ და მაინც აინიცირებენ და აპირებენ პროექტის მიღებას,"- განაცხადა იოსელიანმა