პარტია „ქართული ოცნება - დემოკრატიული საქართველოს“ თავმჯდომარის, ირაკლი კობახიძის განცხადებით, ვაკის პარკში მომხდარი ტრაგედიის გამო თბილისის მერის პოლიტიკურ პასუხისმგებლობაზე საუბარი არის „ცარიელი სპეკულაცია და აბსოლუტურად უადგილო“.
როგორც კობახიძემ ჟურნალისტებს დასმული კითხვის საპასუხოდ განუცხადა, ზოგადად, პოლიტიკური პასუხისმგებლობის საკითხი შეიძლება დადგეს იმ შემთხვევაში, თუ რაიმე სისტემური პრობლემა ვლინდება.
„ამ შემთხვევაში ჩვენ გვაქვს რადიკალურად განსხვავებული სურათი. ამ 5 წლის განმავლობაში, კახი კალაძის ხელმძღვანელობით თბილისის მერიაში ათასობით პროექტი განხორციელდა და ეს პროექტები გამორჩეული იყო მაღალი ხარისხით, როგორც ვიზუალური, ასევე ტექნიკური თვალსაზრისით. აქედან გამომდინარე, არათუ სისტემური პრობლემა არ არსებობს, სისტემურად პროექტები ხორციელება წარმატებით.
ამ შემთხვევაში იყო კონკრეტული გადაცდომა, გულგრილობა, რამაც გამოიწვია ტრაგიკული შედეგი. რაც შეეხება სისტემურ პრობლემას, ასეთი პრობლემა არ ვლინდება. ასეთ ვითარებაში მერის, კახი კალაძის პოლიტიკურ პასუხისმგებლობაზე საუბარი არის ცარიელი სპეკულაცია და აბსოლუტურად უადგილო“, - განაცხადა კობახიძემ.
რაც შეეხება დაზარალებულ მოზარდთან სტუმრობას, როგორც კობახიძე აცხადებს, ეს თბილისის მერის პასუხისმგებლობა იყო, ხოლო ამბავზე გამოხმაურებები არასწორად მიაჩნია.
„მერის მხრიდან ბავშვთან სტუმრობა იყო ელემენტარული პასუხისმგებლობა. ფოტოების დადებას რაც შეეხება, რატომ დადო ბავშვმა ეს ფოტოები და შემდეგ ბავშვის ბულინგი, ესეც არასწორი მგონია. რაც შეეხება კახი კალაძეს, მისი მხრიდან ბავშვთან სტუმრობა იყო მერის პასუხისმგებლობის გამოვლინება“, - განაცხადა კობახიძემ.
