უკრაინის ქალაქ ჩერნიგოვში, გამოფენაზე ტანკსაწინააღმდეგო ჭურვის დეტონაციის შედეგად ოთხი ბავშვი დაშავდა
03.09.2022 ნახვები: 567
უკრაინის ქალაქ ჩერნიგოვის ისტორიულ ცენტრში, გამოფენაზე ტანკსაწინააღმდეგო ჭურვის დეტონაციის შედეგად ოთხი ბავშვი დაშავდა. ამის შესახებ ინფორმაცია უკრაინული მედია ადგილობრივ ხელისუფლებაზე და უკრაინის გენერალური პროკურორის ოფისზე დაყრდნობით ავრცელებს.
ჩერნიგოვის სამხედრო საოლქო ადმინისტრაციის ხელმძღვანელის, ვიაჩესლავ ჩაუსის ცნობით, დაშავებული ორი წლის ბიჭის მდგომარეობა მძიმეა.
„ღონისძიებაზე, რომელიც ითვალისწინებდა ბავშვებისთვის ინტერაქტივს, რატომღაც იყო ექსპოზიცია საბრძოლო იარაღით, რომელიც ამოქმედდა“, – აღნიშნავს ჩაუსი.
მოგვიანებით, უკრაინის პროკურატურაში განაცხადეს, რომ საბრძოლო მასალის დეტონაციის შედეგად დაშავდა ორიდან 12 წლამდე ასაკის ოთხი ბავშვი. დაშავებულები საავადმყოფოში იმყოფებიან სხეულის სხვადასხვა სიმძიმის დაზიანებებით. ჩაუსმა პირობა დადო, რომ მომხდარზე პასუხისმგებელი პირები დაისჯებიან. მომხდართან დაკავშირებით დაწყებულია გამოძიება იარაღთან მოპყრობის წესების დარღვევის მუხლით.
ჩერნიგოვის საქალაქო საბჭოს განცხადებით, აღნიშნული ღონისძიების ჩატარებაზე ხელისუფლებას ოფიციალური ნებართვა არ გაუცია, ასევე არ მიუღია მისი ჩატარების შესახებ არანაირი შეტყობინება.
უკრაინის საზოგადოებრივი მაუწყებლის ინფორმაციით, 10 წლის ბიჭს ხელში ტანკსაწინააღმდეგო ყუმბარმტყორცნი ეკავა, მან სასხლეტს გამოჰკრა, რის შედეგადაც იარაღი ამოქმედდა.
