ისეთი არავინ მეგულება, ვისაც მხარს სიამოვნებით დავუჭერდი. მთავარი პრობლემა ეს არის, – ამის შესახებ „გირჩის“ ლიდერმა იაგო ხვიჩიამ სახალხო დამცველის კანდიდატურასთან დაკავშირებით განაცხადა.
მისივე თქმით, სახალხო დამცველის ინსტიტუტსაც ეჭვის თვალით უყურებს.
„იმის გამო, რომ სახალხო დამცველის კანდიდატურას არასამთავრობო ორგანიზაცია წარადგენს, მას მხარს მხოლოდ ამის გამო არ დავუჭერთ. ამ თემაზე სერიოზული საუბარი ჯერ არ მიმდინარეობს, ჯერ ამ საკითხის მოთელვაა. ვნახოთ, პროცესი სადამდე მიგვიყვანს და რა გადაწყვეტილებას მივიღებთ. იმ კანდიდატს ვერ ვხედავთ, ვისაც მხარს დავუჭერთ, მაგრამ დრო გავიდეს. ჩემი პრობლემა იმაში მდგომარეობს, რომ ისეთი არავინ მეგულება, ვისაც მხარს სიამოვნებით დავუჭერდი. მთავარი პრობლემა ეს არის. იქნებ, ვინმე ახალი გამოჩნდეს და სხვა თვალით შევხედოთ. ისე არავის ვენდობით, რომ მასზე პასუხისმგებლობა ავიღოთ. სახალხო დამცველის ინსტიტუტსაც ეჭვის თვალით ვუყურებ. ამ თვალსაზრისით ისეთი ტრადიცია გვაქვს, რომ დიდი მოლოდინი არ გვაქვს. გვიფიქრია იმაზეც, რომ სახალხო დამცველის კანდიდატი წარვადგინოთ, მაგრამ პროცესების განვითარებას დავაკვირდებით“, – განაცხადა იაგო ხვიჩიამ.
ამასთან, როგორც იაგო ხვიჩია ამბობს, კანონმდებლობაში არსად წერია, რომ სახალხო დამცველს არასამთავრობო ორგანიზაციები ირჩევენ. მისივე თქმით, ოპოზიციური პარტიებიდან არავინ იქცევა სწორად, ვინც თავის გასაკეთებელ საქმეს სხვას გადააბარებს.
„რაც შეეხება ოპოზიციურ პარტიებს, არავინ იქცევა სწორად, ვინც თავის გასაკეთებელ საქმეს სხვას გადააბარებს. ამ შემთხვევაში იმ ოპოზიციას ვგულისხმობ, ვინც ეს საქმე არასამთავრობო ორგანიზაციებს გადააბარა, თითქოს სახალხო დამცველი „ენჯეოშნიკების“ შესარჩევი იყოს, ისინი გვეხმარებიან ამაში. კანონმდებლობაში არსად წერია, რომ სახალხო დამცველს არასამთავრობო ორგანიზაციები ირჩევენ. პოლიტიკური პასუხისმგებლობაა ასაღები იმაზე, თუ ვის წარადგენ და სხვა ვინმეზე ამის გადაბრალება არ შეიძლება. ვისაც წარადგენენ, მხარს დავუჭერ – ეს დამოკიდებულება არასერიოზულია. ვერ ვხვდები, არასამთავრობო სექტორი რა ეზოთერულ ცოდნას ფლობს ისეთს, რაც შეიძლება, პოლიტიკოსებმა არ ვიცოდეთ და უფრო მეტიც, შეუძლებელიც კი იყოს, რომ ეს ვიცოდეთ. ასეთი „ენჯეო“ სექტორში არ მინახავს, მაგრამ დავაკვირდები, იქნებ, მართლა გამოჩნდეს. როგორც წესი, კანდიდატის მხარდაჭერაში ძვირს ვითხოვთ ხოლმე. „ქართულ ოცნებას“ ურჩევნია, ჩვენს კოლეგებთან ივაჭროს, ისინი უფრო იაფად აძლევენ გამოძრომის საშუალებას. სახალხო დამცველის მხარდაჭერის სანაცვლოდ ნარკოპოლიტიკის ლიბერალიზაციას ან ამნისტიას მოვითხოვდით“, – აღნიშნა იაგო ხვიჩიამ.
