აშშ, უკრაინა და ევროპელი პარტნიორები რუსეთ-უკრაინის ომის დასრულების მიზნით მრავალმხრივ მოლაპარაკებებზე გადასვლას და ყოვლისმომცველი, ხანგრძლივი მშვიდობის მიღწევას ისახავენ მიზნად. ამის შესახებ ერთობლივ განცხადებაშია ნათქვამი, რომელიც აბუ-დაბიში დაგეგმილი რუსეთ-უკრაინა-აშშ-ის სამმხრივი მოლაპარაკებების წინ გამართული შეხვედრის შემდეგ გავრცელდა.
შეხვედრაში ევროკავშირის, საფრანგეთის, გერმანიის, იტალიის, დიდი ბრიტანეთის, უკრაინის, აშშ-ისა და ნატოს წარმომადგენლები მონაწილეობდნენ.
განცხადების თანახმად, მხარეებმა განიხილეს ომის დასრულებისა და მდგრადი მშვიდობის მისაღწევად აუცილებელი პირობები, მათ შორის უკრაინისთვის უსაფრთხოების მტკიცე გარანტიების უზრუნველყოფა.
„მონაწილეებმა ხაზი გაუსვეს, რომ ნებისმიერმა მომავალმა შეთანხმებამ პატივი უნდა სცეს სუვერენიტეტის, ტერიტორიული მთლიანობისა და გადაწყვეტილების დამოუკიდებლად მიღების პრინციპებს, ასევე, უკრაინისთვის სანდო უსაფრთხოების გარანტიები უზრუნველყოს“, – აღნიშნულია განცხადებაში.
მოლაპარაკებების ერთ-ერთი მთავარი თემა ომის შემდგომი ევროპული უსაფრთხოების სისტემაც იყო. მონაწილეებმა განიხილეს არსებული ინსტიტუტებისა და შეთანხმებების საფუძველზე ახალი მექანიზმების შექმნა, რომლებიც კონფლიქტის განახლების რისკებს შეამცირებს და შესაძლო ესკალაციის თავიდან აცილებას შეუწყობს ხელს.
„მონაწილეებმა კიდევ ერთხელ დაადასტურეს საერთო ერთგულება ომის შემდგომი ევროპული უსაფრთხოების მყარი არქიტექტურისა და შეთანხმებების მიმართ. ასევე, მკაფიოდ აღნიშნეს, რომ ძლიერი ნატო ევროატლანტიკური კოლექტიური თავდაცვის ცენტრალურ ნაწილად დარჩება“, – ნათქვამია დოკუმენტში.
ერთობლივი განცხადების თანახმად, აშშ, უკრაინა და ევროპელი პარტნიორები სამშვიდობო პროცესის განმავლობაში მჭიდრო კოორდინაციას გააგრძელებენ, რათა მოლაპარაკებები ყოვლისმომცველი და ხანგრძლივი მშვიდობის მიღწევისკენ წარიმართოს.
