2025 წლის 4 ოქტომბრის მოვლენების საქმეზე მსჯავრდებულმა მურთაზ ზოდელავამ საპროცესო შეთანხმების საფუძველზე პენიტენციური დაწესებულება დატოვა. შეთანხმება მასთან ერთად კიდევ სამ მსჯავრდებულს – ლაშა ბერიძეს, ირაკლი ჩხვირკვიასა და გური ჟვანიას გაუფორმდა.
საპროცესო შეთანხმების თანახმად, ოთხივეს სასჯელი 3 წლითა და 1 თვით თავისუფლების აღკვეთით განესაზღვრა, საიდანაც 1 წელი და 1 თვე რეალურ სასჯელად, ხოლო დარჩენილი 2 წელი პირობითად ჩაეთვალათ.
ზოდელავასთან ერთად დღეს საპატიმროს ლაშა ბერიძეც დატოვებს. ირაკლი ჩხვირკვიას გათავისუფლება 6 ნოემბერს, გური ჟვანიასი კი 16 ნოემბერს იგეგმება.
პენიტენციური დაწესებულებიდან გამოსვლის შემდეგ მურთაზ ზოდელავამ განაცხადა, რომ თანამებრძოლების მიმართ პასუხისმგებლობას კვლავ გრძნობს და სწორედ ამიტომ მოუწოდებდა მათ საპროცესო შეთანხმებით სარგებლობისკენ.
„თითქმის ყველა სხდომაზე მე მოვუწოდებდი ჩემთან ერთად დაკავებულ სხვა ადამიანებს, რომ ესარგებლათ საპროცესო შეთანხმების ინსტიტუტით, რაც მოხდა კიდეც, საბედნიეროდ. მიმაჩნია, რომ ახლაც მაქვს პასუხისმგებლობა. არ არის მარტივი, როდესაც შენ რაღაცას მოუწოდებ და ამის შემდეგ ათეულობით ადამიანი ციხეში აღმოჩნდება. ეს მძიმე პასუხისმგებლობაა, რომელსაც ახლაც ვგრძნობ“, – განაცხადა ზოდელავამ.
შეგახსენებთ, თბილისის საქალაქო სასამართლოს თავდაპირველი განაჩენით, 4 ოქტომბრის მოვლენების ორგანიზების საქმეზე მურთაზ ზოდელავასა და ლაშა ბერიძეს 7-7 წლით, ხოლო ირაკლი ჩხვირკვიასა და გური ჟვანიას 5-5 წლით თავისუფლების აღკვეთა ჰქონდათ მისჯილი.
ზოდელავასა და ბერიძეს ბრალად ედებოდათ სტრატეგიული მნიშვნელობის ობიექტების ჯგუფურად ხელში ჩაგდებისა და ბლოკირების მცდელობა, ასევე ჯგუფური ძალადობის ორგანიზება და ხელმძღვანელობა. ზოდელავას დამატებით ბრალი წარდგენილი ჰქონდა კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდების მუხლითაც.
