როგორც ჩხაიძემ „ინტერპრესნიუსთან“ საუბრისას განმარტა, საქართველოში ამჟამად დაახლოებით 15 რესპირაციული ვირუსი ცირკულირებს, რომელთა აქტიურობა განსაკუთრებით შემოდგომა-ზამთრის პერიოდში იზრდება. მათ შორის ყველაზე მძიმე მიმდინარეობითა და გართულებების მაღალი რისკით გრიპი გამოირჩევა.
„გრიპით გამოწვეული გართულებებია ფილტვების ანთება, ცენტრალური ნერვული სისტემის დაზიანება და გულის კუნთის დაზიანება. ყველა მათგანი შესაძლოა საშიში იყოს სიცოცხლისთვის“, – განაცხადა ჩხაიძემ.
მისი განმარტებით, გრიპის საწინააღმდეგო ვაქცინაცია შესაძლებელია ექვსი თვის ასაკიდან, თუმცა განსაკუთრებით მნიშვნელოვანია იმ ადამიანებისთვის, რომლებსაც დაავადების მძიმე ფორმით მიმდინარეობისა და გართულებების მაღალი რისკი აქვთ.
ასეთ ჯგუფებს მიეკუთვნებიან ხუთ წლამდე ასაკის ბავშვები, ხანდაზმულები, ორსულები, იმუნოდეფიციტური მდგომარეობის მქონე პირები და ქრონიკული დაავადებების, მათ შორის გულ-სისხლძარღვთა სისტემის დაავადებების, ფილტვების ქრონიკული პათოლოგიებისა და შაქრიანი დიაბეტის მქონე ადამიანები.
ჩხაიძის თქმით, ვაქცინაციის გადავადება საჭიროა იმ შემთხვევაში, თუ აცრის დღეს ადამიანს მაღალი ტემპერატურა ან მწვავე დაავადების ნიშნები აღენიშნება.
„გრიპის საწინააღმდეგო ვაქცინის გაკეთება არ შეიძლება ვაქცინაციის დღეს მაღალი ტემპერატურისა და მწვავე დაავადების ნიშნების არსებობისას, როგორიცაა, მაგალითად, გამონაყარი, ყელის ტკივილი ან ნაწლავთა მოქმედების დარღვევა. ასეთ დროს ვაქცინაცია უნდა გადავადდეს, სანამ ადამიანი გამოჯანმრთელდება“, – განმარტა მან.
პროფესორმა ვაქცინაციის შემდეგ ალკოჰოლის მიღების საკითხზეც ისაუბრა. მისი თქმით, აცრის შემდეგ პირველი ერთი-ორი დღის განმავლობაში ალკოჰოლისგან თავის შეკავება სასურველია, თუმცა გრიპის საწინააღმდეგო ვაქცინასა და ალკოჰოლს შორის სპეციფიკური უკუჩვენება არ არსებობს.
„სასურველია, პირველი დღის განმავლობაში თავი შეიკავოთ ალკოჰოლის მიღებისგან არა გართულების ან შესაძლო გვერდითი მოვლენის გამო. ამ პერიოდში სჯობს, ცხოვრების ჯანსაღი წესით იმოქმედოთ. რაიმე სპეციფიკური უკუჩვენება ან შეზღუდვა არ არსებობს“, – აღნიშნა ჩხაიძემ.
მისივე განცხადებით, გრიპის საწინააღმდეგო აცრა ყოველწლიურად უნდა ჩატარდეს, რადგან ვაქცინით მიღებული დაცვა სეზონურია.
„ყოველ წელს ახალი ვაქცინის გაკეთება აუცილებელი და სასურველია. გრიპის საწინააღმდეგო ვაქცინა მოქმედებს არაუმეტეს ექვსი თვისა, რადგან ის პირდაპირ კავშირშია გრიპის სეზონთან“, – განაცხადა მან.
ჩხაიძის განმარტებით, ვაქცინის გაკეთებიდან მაქსიმალური იმუნური დაცვის ჩამოყალიბებას დაახლოებით ორი კვირა სჭირდება, რის გამოც აცრის დროულად ჩატარებას განსაკუთრებული მნიშვნელობა აქვს.
პროფესორის ინფორმაციით, წელს საქართველოში გრიპის საწინააღმდეგო სამკომპონენტიანი ვაქცინა იქნება ხელმისაწვდომი. გასულ სეზონზე გამოყენებული ოთხკომპონენტიანი ვაქცინისგან განსხვავებით, ახალი ვაქცინა გრიპის ვირუსის სამ ვარიანტზეა გათვლილი.
მისი თქმით, ერთ-ერთი B ტიპის ვირუსის ხაზი, რომელიც მანამდე ოთხკომპონენტიანი ვაქცინის შემადგენლობაში შედიოდა, ბოლო პერიოდში დაავადების შემთხვევებს აღარ იწვევდა.
გრიპის საწინააღმდეგო აცრის ჩატარება შესაძლებელია ქვეყნის მასშტაბით იმუნიზაციის სერვისის მიმწოდებელ ყველა ავტორიზებულ სამედიცინო დაწესებულებაში.
წყარო: „ინტერპრესნიუსი“.
