პოლიტიკური პარტია „გირჩი“ სახელს იცვლის და საქმიანობას „თავისუფალი ხალხის პარტიის“ სახელით გააგრძელებს. ამის შესახებ პარტიის მიერ გავრცელებულ განცხადებაშია ნათქვამი.
პარტიაში განმარტავენ, რომ სახელწოდება „გირჩი“ თავდაპირველად თავისუფლების იდეის ნეიტრალურ და ადვილად დასამახსოვრებელ სიმბოლოდ შეარჩიეს, თუმცა მოგვიანებით ამავე სახელწოდების მქონე სხვა პოლიტიკური პარტიების გამოჩენამ საზოგადოებაში დაბნეულობა გამოიწვია.
„ალბათ წარმატებული გამოვიდა, ვინაიდან, ჩვენ გარდა, ბოლო წლებში კიდევ ორ პარტიას დაერქვა ეს სახელი. ჩვენი მოწინააღმდეგეები ამ გაუგებრობას შესანიშნავად იყენებენ და ხან რას გამოაცხადებენ ჩვენს ნათქვამად თუ პოზიციად და ხან — რას“, — ნათქვამია განცხადებაში.
პარტიის შეფასებით, ხშირია შემთხვევებიც, როდესაც მათთან კავშირის არმქონე პირებს „გირჩის“ წევრებად ან აქტივისტებად წარმოაჩენენ, რაც საზოგადოებაში პარტიის შესახებ არასწორ წარმოდგენას ქმნის და მის ძირითად იდეას აზიანებს.
„გადავწყვიტეთ, ეს დავასრულოთ და გადავშალოთ პოლიტიკური ცხოვრების ახალი ფურცელი — დავირქვათ ის, რაც რეალურად ვართ, სულ ვიყავით და მომავალშიც ვიქნებით: „თავისუფალი ხალხის პარტია““, — აცხადებენ პარტიაში.
