რუსეთის როსტოვის ოლქში 29 აგვისტოს ღამით დრონებით მასშტაბური თავდასხმა განხორციელდა. დარტყმის შედეგად დაზიანდა ონლაინ-ვაჭრობის კომპანია Ozon-ის ლოჯისტიკური ობიექტი, ხოლო ელექტრონიკისა და საყოფაცხოვრებო ტექნიკის კომპანია DNS-ის საწყობში ძლიერი ხანძარი გაჩნდა.
უკრაინული მედიის ინფორმაციით, აფეთქებების ხმა მთელი ღამის განმავლობაში ისმოდა დონის როსტოვში, ბატაისკსა და აქსაიში. ასევე ვრცელდება ინფორმაცია აქსაის რაიონში გემთმშენებელ საწარმოზე დარტყმის შესახებ.
Ozon-მა დაადასტურა, რომ მისი ერთ-ერთი ლოჯისტიკური ობიექტი დრონით თავდასხმის სამიზნე გახდა. კომპანიის განცხადებით, თანამშრომლები წინასწარ გაიყვანეს შენობიდან, ობიექტზე გაჩენილი მცირე ხანძარი კი მალევე ჩააქრეს. უსაფრთხოების შემოწმების მიზნით საწყობის მუშაობა დროებით შეჩერებულია.
როსტოვის ოლქის გუბერნატორის, იური სლიუსარის განცხადებით, რეგიონზე განხორციელებული თავდასხმის შედეგად შვიდი ადამიანი დაშავდა. მათგან ორი ზრდასრული და ორი ბავშვი საავადმყოფოში გადაიყვანეს. დონის როსტოვში დრონის ნამსხვრევებმა ორი მრავალსართულიანი საცხოვრებელი კორპუსიც დააზიანა და მოსახლეობის ევაკუაცია გახდა საჭირო.
რუსეთის ხელისუფლება მომხდარს უკრაინულ დრონებით თავდასხმად აფასებს. უკრაინულ მხარეს ამ კონკრეტულ ობიექტებზე დარტყმის შესახებ ოფიციალური განცხადება ამ დროისთვის არ გაუვრცელებია.
