მთავრობის ანგარიშვალდებულება პარლამენტის წინაშე არ გულისხმობს იმას, რომ დადგება ვიღაც ტრიბუნასთან და მოყვება სადღეგრძელოებს, ზეპირსიტყვიერ მითებს იმის შესახებ, რა კარგად ცხოვრობს ქვეყანა,- ამის შესახებ ფრაქცია „ლელო - პარტნიორობა საქართველოსთვის" წევრმა ანა ნაცვლიშვილმა პარლამენტში პრემიერ-მინისტრის ირაკლი ღარიბაშვილის წლიური მოხსენებით მისვლასთან დაკავშირებით განაცხადა.
მისი თქმით, მნიშვნელოვანია, როგორ წარსდგება დღეს მთავრობის მეთაური დეპუტატების წინაშე, ხელცარიელი, თუ ანგარიშებითა და კვლევებით ხელში, რომელიც მთავრობის მიერ მიღებული გადაწყვეტილებებისა და მათ შორის პანდემიის მართვის მიმართულებით არსებულ კონკრეტულ შედეგებს ასახავს.
„რაც შეეხება პრემიერის მოსვლას, მნიშვნელოვანია დღეა, მაგრამ მანამ, სანამ დავსვამთ კითხვას, რა კითხვები ექნებათ დეპუტატებს მასთან და პარლამენტი როგორ დახვდება პრემიერს, მე მგონი არ უნდა გადავახტეთ მოვლენათა თანმიმდევრობას. მნიშვნელოვანია, პრემიერი რით მოვა პარელამენტში - ხელცარიელი, ზეპირსიტყვიერი სადღეგრძელოს მსგავსი განცხადებებით თუ ანგარიშებით, კვლევებითა და დასაბუთებებით იმ მნიშვნელოვან და მტკივნეულ გადაწყვეტილებებთან დაკავშირებით თუ მიუღებელ გადაწყვეტილებებთან დაკავშირებით, რომლებსაც ელოდებოდა ხალხი და ეს გადაწყვეტილებები არ იქნა მიღებული, მათ შორის, ეს ეხებოდა პანდემიის მართვას. მთავრობის ანგარიშვალდებულება პარლამენტის წინაშე არ გულისხმობს იმას, რომ დადგება ვიღაც ტრიბუნასთან და მოყვება სადღეგრძელოებს, ზეპირსიტყვიერ მითებს იმის შესახებ, რა კარგად ცხოვრობს ქვეყანა. ეს გულისხმობს მტკიცებულებების მოტანას, რაზე დაყრდნობით იღებდა მთავრობა გადაწყვეტილებებს და მთავრობის მიერ მიღებულმა გადაწყვეტილებებმა ციფრებსა და კონკრეტიკაში რა შედეგი მოუტანა ქვეყანას,"- განაცხადა ანა ნაცვლიშვილმა.
