მსოფლიოში კორონავირუსის რეკორდული დღიური რაოდენობა დაფიქსირდა

ბოლო 24 საათis განმავლობაში, მსოფლიოში, კორონავირუსის 307 930 ახალი შემთხვევა დადასტურდა. ეს რაოდენობა რეკორდულად მაღალი დღიური მაჩვენებელია პანდემიის დაწყების დროიდან.

ჯანდაცვის მსოფლიო ორგანიზაციის ინფორმაციით, მსოფლიოში, გასული დღე-ღამის განმავლობაში კოვიდ 19-ს კიდევ 5 537 ადამიანის სიცოცხლე ემსხვერპლა და დაღუპულთა რიცხვმა, საერთო ჯამში, 917 417-ს მიაღწია.

ყველაზე მეტი, 94 372 ახალი შემთხვევა ინდოეთში გამოვლინდა, აშშ-ში დაფიქსირებულია - 45 523, ბრაზილიაში კი - 43 718 შემთხვევა.
როგორც აშშ-ში, ასევე ინდოეთში, გასული დღე-ღამის განმავლობაში ვირუსს 1000-ზე მეტი ადამიანის სიცოცხლე ემსხვერპლა, ბრაზილიაში კი 874 ადამიანია გარდაცვლილი.

ჯანმო-ს ინფორმაციით, ინფიცირების შემთხვევების რეკორდულად მაღალი დღიური მაჩვენებელი ბოლოს 6 სექტემბერს დაფიქსირდა, როდესაც მსოფლიოში 306 857 ახალი შემთხვევა გამოვლინდა, ყველაზე მეტი ფატალური შემთხვევა კი 17 აპრილს დადასტურდა, როდესაც ვირუსს 12 430 ადამიანის სიცოცხლე ემსხვერპლა.