უკრაინა მზადაა ომის დასასრულებლად რუსეთის ფედერაციასთან მოლაპარაკებების გასამართად, რადგან დიპლომატიური გზა მილიონობით ადამიანის სიცოცხლეს გადაარჩენს, – ამის შესახებ უკრაინის პრეზიდენტმა ვოლოდიმირ ზელენსკიმ პრესკონფერენციაზე განაცხადა.
ზელენსკიმ აღნიშნა, რომ რუსული აგრესიის დასაწყისიდანვე დაჟინებით მოითხოვდა რუსეთის ფედერაციასთან პირდაპირი მოლაპარაკებების გამართვას, რადგან შუამავლების მეშვეობით დიალოგის ნებისმიერი ფორმატი არაეფექტურია.
„ომის შეჩერება მინდა, მისი დასრულება. არის დიპლომატიური გზა, არის სამხედრო გზა. ამიტომ ნებისმიერი ჯანმრთელი ადამიანი ყოველთვის დიპლომატიურ გზას ირჩევს, რადგან მან იცის: თუნდაც რთული იყოს, მას შუძლია, შეაჩეროს ათასობით, ათიათასობით ადამიანის დაკარგვა და ასეთ მეზობლებთან ერთად ასობით ათასი, შესაძლოა, მილიონობით სიცოცხლეც კი. მილიონობით ადამიანი შეიძლება, დაიღუპოს. ეს არ არის სასურველი და ნებისმიერ ლიდერს, ეს სურს თუ არა პირადად, არ აქვს უფლება, დიპლომატიური გზა გააუქმოს“, – განაცხადა ზელენსკიმ.
ზელენსკის თქმით, დღეს უკრაინის საერთაშორისო პარტნიორებმა, კერძოდ, ევროკავშირის ქვეყნებმა, აშშ-მა და კანადამ დაინახეს რუსეთის მხრიდან სამშვიდობო მოლაპარაკებების წარმოების სურვილის არქონა.
„დღეს ჩვენ გვაქვს ნდობა ჩვენი პარტნიორებისგან უმაღლეს დონეზე და რუსეთს უბრალოდ არ აქვს ნდობა. „რუსეთი“ და „ნდობა“ – ეს დღეს არის ანტონიმები“, – განაცხადა უკრაინის პრეზიდენტმა.
ზელენსკიმ ხაზგასმით აღნიშნა, რომ უკრაინელებმა აგრესორის წინააღმდეგ ბრძოლაში უშიშრობა გამოავლინეს, ამიტომ მას რუსეთთან მოლაპარაკების არ ეშინია.
„ლიდერს უფლება არ აქვს შეშინდეს, როდესაც საქმე ჩვენს სახელმწიფოს და ჩვენ დამოუკიდებლობას ეხება“, – განაცხადა ზელენსკიმ.
მისივე თქმით, მარიუპოლში მათი ხალხი თუ განადგურდება, თუ გამოცხადდება ფსევდორეფერენდუმი დროებით ოკუპირებულ ტერიტორიებზე, ხერსონისა და ზაპოროჟიეს რეგიონებში, უკრაინა მოლაპარაკების პროცესს დატოვებს.
„მიმაჩნია, რომ ეს არ არის ამ სიტუაციის დიპლომატიური მოწესრიგებისთვის სასარგებლო. ეს აუცილებლად შეუშლის დიპლომატიური გზით ომის დასრულებას. ეს ნამდვილად არასწორი ნაბიჯია რუსეთის მხრიდან. ეს იმაზე მეტყველებს, რომ ყველაფერი, რაც აქამდე მოხდა, დიპლომატიური ჯგუფების ყველა შეხვედრა, მხატვრული და პოლიტიკური თეატრია“, – განაცხადა ზელენსკიმ.
ზელენსკიმ ასევე მოუწოდა უკრაინის მოქალაქეებს, რომლებიც იმყოფებიან დროებით ოკუპირებულ ტერიტორიებზე ხერსონისა და ზაპოროჟიეს რეგიონებში, არ დაეხმარონ ოკუპანტებს.
