გერმანიის ხელისუფლება გაზის მიწოდების შესაძლო შეფერხებისთვის ემზადება. მთავრობამ გაზის მიწოდების მოქმედი რეგულაციის შესაბამისად გაფრთხილების ადრეული რეჟიმი აამოქმედა.
გერმანიაში გაზის მიწოდებასთან დაკავშირებით მოქმედი საგანგებო რეგულაციის მიხედვით, ადრეული გაფრთხილება არის სამსაფეხურიანი გეგმის პირველი ეტაპი, რომელიც სახელმწიფოს მხრიდან ჩარევას ჯერ არ ითვალისწინებს.
როგორც გერმანიის ეკონომიკის მინისტრმა რობერტ ჰაბეკმა განაცხადა, ამჟამად ქვეყანაში გაზის მიწოდებასთან დაკავშირებით შეფერხებები არ არის და ხელისუფლება აკვირდება ბაზრის ოპერატორებთან არსებულ სიტუაციას.
ამასთან, მინისტრის თქმით, ეკონომიკის სამინისტროში შეიქმნება კრიზისის მართვის ჯგუფი.
„იმისთვის, რომ მზად ვიყოთ ამ სიტუაციისთვის, დღეს დილით გამოვაცხადე ადრეული გაფრთხილება გაზის რეგულაციის შესაბამისად. ადრეული გაფრთხილება არის სამი შესაძლო ნაბიჯიდან პირველი და გულისხმობს სიტუაციის მონიტორინგს რეგულაციის შესაბამისად. სამინისტროში შეიქმნება კრიზისის მართვის ჯგუფი", - განაცხადა გერმანიის ეკონომიკის მინისტრმა რობერტ ჰაბეკმა.
ევროპაში გაზის მიწოდების შეფერხების საფრთხე მას შემდეგ შეიქმნა, რაც „დიდი შვიდეულის" ქვეყნებმა უარი განაცხადეს ვლადიმერ პუტინის მოთხოვნაზე, ბუნებრივი აირის საფასური რუსული რუბლით გადაიხადონ.
