საქართველოს კულტურის, სპორტისა და ახალგაზრდობის სამინისტრომ კონკურსის „კერძო თეატრების საქმიანობის ხელშეწყობა" გამარჯვებული პროექტები გამოავლინა. ესენია:
1. „შავი ფრინველი", დაფინანსდა სპექტაკლის დადგმა; განმახორციელებელი - ა(ა)იპ „თეატრი ათონელზე";
2. „ქართული პიესის კითხვის დღეები", განმახორციელებელი ა(ა)იპ „მდგმურები". დაფინანსდა კონკურსი სამი ქართველი დრამატურგის შერჩევის მიზნით და გამარჯვებული პიესების კითხვა სამაგიდო ფორმატში. პროექტში ერთობლივად მიიღებენ მონაწილეობას პიესის ავტორი ქართველი დრამატურგი, რეჟისორები და მსახიობები.
3. „თბილისის კამერული თეატრის გახმოვანების ბაზის შექმნა", დაფინანსდა თეატრის გახმოვანების ბაზით აღჭურვა; განმახორციელებელი - ა(ა)იპ „ახალგაზრდული ხელოვნების განვითარების ფონდი შემოქმედებითი ლაბორატორია".
4. ბერტოლტ ბრეხტის „სეჩუანელი კეთილი ადამიანის" მიხედვით დადგმული სპექტაკლი - „ღმერთები", დაფინანსდა თეატრის გასტროლი საქართველოს სამ ქალაქში: ქუთაისი, ბათუმი და ოზურგეთი; განმახორციელებელი - შპს „ხვლიკი";
5. „თავისუფალი თეატრის საქმიანობის ხელშეწყობა", დაფინანსდა თეატრის შემოქმედებითი ფუნქციონირებისათვის საჭირო ხარჯები; განმახორციელებელი - ა(ა)იპ „თბილისის თეატრალური ცენტრი";
6. პროექტის „ჩვენი თეატრის მოგზაურობა საქართველოში" ფარგლებში დაფინანსდა საბავშვო თეატრის გასტროლი საქართველოს ათ ქალაქში: გორი, ხაშური, დედოფლისწყარო, მარნეული, თეთრიწყარო, დუშეთი, ყაზბეგი, ჭიათურა, ზესტაფონი და საჩხერე; განმახორციელებელი - შპს „ჩვენი თეატრი";
7. პროექტის „ქორეოგრაფიის ახალი პროფესიული თეატრის გასტროლი" ფარგლებში დაფინანსდა თეატრის გასტროლი ქუთაისის მ. ბალანჩივაძის სახელობის ოპერისა და ბალეტის თეატრში; განმახორციელებელი - ა(ა)იპ „ქორეოგრაფიის ახალი პროფესიული თეატრი".
კულტურის სამინისტროს ცნობით, კონკურსის ჯამური ბიუჯეტი შეადგენდა 230 000 ლარს და მის ფარგლებში სამინისტროს მომართა 13-მა განმცხადებელმა.
