ამის შესახებ ტრამპმა ჟურნალისტებთან საუბრისას განაცხადა, იუწყება New York Post.
„ვფიქრობ, სინამდვილეში შეთანხმების მიღწევა პუტინს უფრო მეტად სურს, ვიდრე ზელენსკის“, — აღნიშნა აშშ-ის პრეზიდენტმა.
ტრამპის განცხადებით, მისი უშუალო ჩარევით რუსეთი და უკრაინა ენერგეტიკულ ინფრასტრუქტურაზე თავდასხმების შეზღუდვის შესახებ შეთანხმდნენ.
„ისინი დათანხმდნენ ენერგეტიკულ ზავს. იცით, რატომ? იმიტომ, რომ მე ვუთხარი, დათანხმდით-მეთქი. სწორედ ამიტომ დათანხმდნენ. ეს საკითხი უნდა მოგვარდეს“, — განაცხადა მან.
ამასთან, აშშ-ის პრეზიდენტის მტკიცებით, ცეცხლის შეწყვეტის რეჟიმის დარღვევებს ორივე მხრიდან ჰქონდა ადგილი. მას არ დაუკონკრეტებია, რომელ შემთხვევებს გულისხმობდა.
ტრამპმა კიდევ ერთხელ მოუწოდა რუსეთისა და უკრაინის პრეზიდენტებს პირდაპირი შეხვედრისა და ომის დასრულებისკენ.
„მხოლოდ ის ვიცი, რომ ზელენსკი და პუტინი უნდა შეხვდნენ ერთმანეთს და დაასრულონ ეს უაზრო ომი. მხოლოდ ამ თვეში მათ ამ ომში 32 000 ადამიანი დაკარგეს, რაც აღმაშფოთებელია. ამიტომ ისინი უნდა შეხვდნენ და ეს საქმე მოაგვარონ“, — განაცხადა ტრამპმა.
მის მიერ დასახელებული დანაკარგების რაოდენობა დამოუკიდებლად დადასტურებული არ არის. აშშ-ის პრეზიდენტს ასევე არ განუმარტავს, 32 000 ადამიანში მხოლოდ სამხედრო მოსამსახურეებს გულისხმობდა თუ ომის შედეგად დაღუპულ და დაშავებულ პირებს ერთად.
ტრამპის შეფასებით, რუსეთსა და უკრაინას შორის შეთანხმების მიღწევა შესაძლებელია, თუმცა ამისთვის მხარეებს დამატებითი ძალისხმევა სჭირდებათ.
„ვფიქრობ, მათ შეთანხმების მიღწევა სურთ, მაგრამ არ იციან, როგორ. თუმცა ჩვენ მივაღწევთ იმას, რომ ისინი შეთანხმდნენ. პუტინს შეთანხმების მიღწევა სურს და ჩვენ უნდა მივაღწიოთ იმას, რომ ზელენსკისაც სურდეს შეთანხმება“, — აღნიშნა აშშ-ის პრეზიდენტმა.
ტრამპის განცხადებები უკრაინის ენერგეტიკულ ინფრასტრუქტურაზე რუსეთის თავდასხმებისა და შესაძლო ენერგეტიკული ზავის შესახებ მიმდინარე განხილვების ფონზე გაკეთდა.
უკრაინის ხელისუფლება აცხადებს, რომ მზად არის ენერგეტიკულ ობიექტებზე თავდასხმების ორმხრივად შეწყვეტისთვის, თუმცა მოსკოვისგან ანალოგიური ვალდებულების შესრულებას მოითხოვს.
წყარო: New York Post.
