ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი აცხადებს, რომ ევროკავშირის საგარეო საქმეთა მინისტრები დღეს საქართველოს საკითხს მოკლედ განიხილავენ, ხოლო იანვარში ამ თემაზე სიღრმისეული დისკუსიის გამართვის ინიციატივით გამოვა.
ამის შესახებ კალასმა ლუქსემბურგში, ევროკავშირის საგარეო საქმეთა საბჭოს სხდომის დაწყებამდე განაცხადა.
„საქართველოზე დღეს ძალიან მოკლედ ვისაუბრებთ, მაგრამ შევთავაზებ, რომ იანვარში საქართველოს შესახებ სიღრმისეული დისკუსია გვქონდეს“, — აღნიშნა კალასმა.
ევროკავშირის საგარეო საქმეთა საბჭოს სხდომა დღეს, 12 ოქტომბერს, ლუქსემბურგში იმართება. შეხვედრაში ევროკავშირის წევრი სახელმწიფოების საგარეო საქმეთა მინისტრები მონაწილეობენ.
საბჭოს დღის წესრიგში საქართველოსთან ერთად უკრაინის წინააღმდეგ რუსეთის ომი, მოსკოვის ჰიბრიდული მოქმედებები, უკრაინის მხარდაჭერისა და რუსეთზე ზეწოლის გაძლიერების საკითხები, ასევე ახლო აღმოსავლეთში არსებული ვითარებაა.
კალასს არ დაუკონკრეტებია, რა კონკრეტულ საკითხებს დაეთმობა საქართველოს შესახებ იანვარში დაგეგმილი შესაძლო დისკუსია და განიხილება თუ არა რაიმე ახალი გადაწყვეტილების მიღება.
მისი განცხადებიდან გამომდინარე, იანვრის შეხვედრის გამართვა ამ ეტაპზე ინიციატივაა და არა უკვე მიღებული გადაწყვეტილება.
წყარო: ევროკომისიის აუდიოვიზუალური სამსახური.
