პროკურატურის ინფორმაციით, გამოძიების დაწყების საფუძველი გახდა შპს „ბიტექსჩეინჯის“ ხელმძღვანელი პირების განცხადებები, რომლებიც უწყებას საქართველოს ეროვნულმა ბანკმა გადაუგზავნა.
საქმე საქართველოს სისხლის სამართლის კოდექსის 337-ე მუხლით მიმდინარეობს, რაც მოხელის ან მასთან გათანაბრებული პირის მიერ სამეწარმეო საქმიანობაში უკანონო მონაწილეობას გულისხმობს.
საგამოძიებო უწყების ცნობით, „ბიტექსჩეინჯის“ წარმომადგენლების მიერ წარდგენილი განცხადებებისა და თანდართული აუდიოჩანაწერების მიხედვით, ნანა ყეინიშვილი შესაძლოა ჩართული იყოს ეროვნული ბანკის რეგულირებას დაქვემდებარებული კომპანიების საქმიანობაში.
განმცხადებლები ამტკიცებენ, რომ ყეინიშვილი უშუალოდ აკონტროლებს საწარმოთა ქსელს, რომელთა წილები მისი ოჯახის წევრისა და მასთან დაკავშირებული პირების სახელზეა რეგისტრირებული. მათივე მტკიცებით, ეროვნული ბანკის საბჭოს წევრი ერთ-ერთი რეგულირებადი კომპანიის წილის შეძენასაც ცდილობდა, რაც მისი ბიზნესსაქმიანობის გაფართოებას ემსახურებოდა.
პროკურატურა განმარტავს, რომ საქართველოს კანონმდებლობა საჯარო თანამდებობის პირებისთვის სამეწარმეო საქმიანობაში მონაწილეობასთან დაკავშირებით კონკრეტულ შეზღუდვებს ითვალისწინებს.
კერძოდ, „კორუფციის წინააღმდეგ ბრძოლის შესახებ“ კანონი საჯარო მოსამსახურეს სამეწარმეო საქმიანობის განხორციელებას უკრძალავს. ამასთან, „საქართველოს ეროვნული ბანკის შესახებ“ ორგანული კანონის თანახმად, ეროვნული ბანკის საბჭოს წევრსა და მისი ოჯახის წევრებს არ აქვთ უფლება, იყვნენ საქართველოს საფინანსო სექტორის წარმომადგენელი კომპანიის ან მასთან დაკავშირებული იურიდიული პირის პარტნიორები.
„მიმდინარე გამოძიების ფარგლებში მოხდება საქართველოს ეროვნული ბანკის საბჭოს წევრის ნანა ყეინიშვილის სამეწარმეო საქმიანობაში შესაძლო უკანონო მონაწილეობის გარემოებების შესწავლა და გამოძიების შედეგების შესახებ საზოგადოებას ეცნობება დამატებით“, – აცხადებენ გენერალურ პროკურატურაში.
ამ ეტაპზე გამოძიება წარდგენილ განცხადებებსა და მათში მითითებულ გარემოებებს სწავლობს. ნანა ყეინიშვილის მხრიდან კანონდარღვევა დადგენილი არ არის.
