უკრაინის პრეზიდენტი ვოლოდიმირ ზელენსკი არ ეთანხმება აშშ-ის სახელმწიფო მდივნის, მარკო რუბიოს შეფასებას, რომლის თანახმადაც უკრაინაში ომის დიპლომატიური გზით დასრულების მცდელობები ჩიხში შევიდა. ზელენსკის განცხადებით, არსებული ვითარება არა დიპლომატიური შესაძლებლობების ამოწურვით, არამედ რუსეთზე საკმარისი ზეწოლის განსახორციელებლად პოლიტიკური ნების ნაკლებობით არის განპირობებული.
ამის შესახებ უკრაინის პრეზიდენტმა ჟურნალისტებთან ქალაქ პრილუკიში ისაუბრა, სადაც, გავრცელებული ინფორმაციით, საცხოვრებელ სახლზე რუსული სარაკეტო დარტყმის შედეგად 22 ადამიანი დაიღუპა, მათ შორის ხუთი ბავშვი.
ზელენსკიმ გააკრიტიკა რუსეთის მიმართ აშშ-ის მიდგომა და აღნიშნა, რომ მოსკოვთან სამომავლო ეკონომიკური თანამშრომლობის განხილვა და, იმავდროულად, დიპლომატიური პროცესის ჩიხში შესვლაზე საუბარი ურთიერთგამომრიცხავია.
„არ შეიძლება, ერთი მხრივ, რუსებს სამომავლო ეკონომიკურ პროექტებზე ელაპარაკებოდე და, მეორე მხრივ, ამბობდე, რომ დიპლომატიურ ჩიხში ვართ. არ ვართ დიპლომატიურ ჩიხში. ჩაკეტეთ მათი მთელი ეკონომიკა. პირი გაუკერეთ რუსეთს. ნუ კვებავთ მათ თქვენი მიყიდვებით. უბრალოდ სანქციები დაუწესეთ მათ შეიარაღებას. გახსენით „სტარლინკი“ ჩვენთვის, უკრაინისთვის“, – განაცხადა ზელენსკიმ.
უკრაინის პრეზიდენტმა შეერთებულ შტატებს მოუწოდა, გააძლიეროს რუსეთის წინააღმდეგ ეკონომიკური და სამხედრო ზეწოლა და უკრაინას საჰაერო სივრცის დაცვასა და უპირატესობის მოპოვებაში დაეხმაროს.
მისი თქმით, აშშ-მა ირანთან დაპირისპირების დროს შესაბამისი ტექნოლოგიური შესაძლებლობები გამოიყენა, რამაც, ზელენსკის შეფასებით, ისრაელს ირანის საჰაერო სივრცეზე კონტროლის მოპოვებაში შეუწყო ხელი.
„როდესაც გჭირდებათ, ეს მუშაობს. მათთვის უკრაინის დახმარება არაფერი არ ღირს. ღიად ვამბობ: მოგვეცით შესაძლებლობა, დაგვეხმარეთ ცის დაცვასა და უპირატესობის მოპოვებაში. შედეგად პუტინი მოლაპარაკების მაგიდასთან დაჯდება. რატომ? იმიტომ, რომ ყველაფერს დაკარგავს. ორ-სამ თვეში ყველაფერს დაკარგავს“, – განაცხადა უკრაინის პრეზიდენტმა.
ზელენსკიმ ასევე გამოთქვა შეშფოთება, რომ დროთა განმავლობაში ჩინეთმა შესაძლოა შესაბამისი ტექნოლოგიური ალტერნატივა შექმნას და რუსეთს გადასცეს.
„ჩვენ კი ველოდებით, როდის ექნებათ ჩინელებს ამის ანალოგი და რუსებს გადასცემენ. მაშინ სად არის სიმართლე, სად არის პატიოსნება? რა ჩიხი? ეს ჩიხი არ არის, ეს ნების ნაკლებობაა“, – აღნიშნა მან.
უკრაინის პრეზიდენტის განცხადებით, რუსეთისთვის ეკონომიკური შესაძლებლობების შეზღუდვა და უკრაინის სამხედრო პოზიციების გაძლიერება მოსკოვს რეალურ მოლაპარაკებებზე წასვლას აიძულებს.
