ისრაელის პრეზიდენტმა იცხაკ ჰერცოგმა ქართველი წარმოშობის ექიმი შოთა მუსაევი სამოქალაქო გმირობისთვის მედლით დააჯილდოვა. მუსაევი იმ ექვს ადამიანს შორისაა, რომლებმაც დუბაიდან ისრაელის მიმართულებით ფრენისას თავდასხმის მცდელობა აღკვეთეს და დაშავებულ პილოტს დახმარება აღმოუჩინეს.
ისრაელის პრეზიდენტის ადმინისტრაციისა და ადგილობრივი მედიის ინფორმაციით, თვითმფრინავში მყოფმა მგზავრებმა თავდამსხმელის განეიტრალება შეძლეს, რითაც ეკიპაჟისა და მგზავრების უსაფრთხოების დაცვაში მნიშვნელოვანი როლი შეასრულეს.
სამოქალაქო გმირობისთვის შოთა მუსაევთან ერთად დაჯილდოვდნენ იანივ ჰაიონი, ცვიკა მანასი, ტალი მანასი, ასაფ რაჟვანი და ორ პერდილოვი.
გავრცელებული ინფორმაციით, თავდასხმის შედეგად დაჭრილ პილოტს სამედიცინო დახმარება სწორედ შოთა მუსაევმა აღმოუჩინა.
დაჯილდოებისას მუსაევმა აღნიშნა, რომ მომხდარის დროს თითოეული ადამიანის მოქმედებას გადამწყვეტი მნიშვნელობა ჰქონდა.
„ბევრი სასწაული მოხდა მაგ დღეს. ადამიანთა ჯაჭვს წარმოვადგენთ, რომლებმაც დახმარება გაწიეს; ერთი რგოლიც რომ დაკლებულიყო, ჯაჭვი გაწყდებოდა. ყველა გმირულად მოქმედებდა“, – განაცხადა შოთა მუსაევმა.
ინფორმაციას ისრაელის პრეზიდენტის ადმინისტრაციასა და ისრაელურ მედიაზე დაყრდნობით გამოცემა Ynet ავრცელებს.
