„საქართველო მხოლოდ ქაღალდზეა კანდიდატი ქვეყანა“, - ამის შესახებ გაფართოების საკითხებში ევროკომისარმა მარტა კოსმა პრესკონფერენციაზე განაცხადა.
მისი თქმით, საქართველოში მიმდინარე მოვლენები ევროკომისიის გაფართოების ანგარიშში აისახება, რომელიც ოქტომბრის ბოლოს გამოქვეყნდება.
„როგორც იცით, საქართველო მხოლოდ ქაღალდზეა კანდიდატი ქვეყანა. ვწუხვარ ამის გამო. ვისურვებდი, რომ საქართველოც, ქართველი ხალხის უდიდესი მხარდაჭერით, ყოფილიყო დღეს იმავე დონეზე, რაზეც მოლდოვა და უკრაინაა.
ქვეყანასთან როგორ გავაგრძელებთ ურთიერთობას, დიდწილად დამოკიდებულია იმაზე, წევრი ქვეყნები როგორ შეაფასებენ მის მომავალს, მაგრამ ბევრი რამ, რაც საქართველოში ახლა ხდება, წარმოდგენილი იქნება ოქტომბრის ბოლოს გაფართოების ანგარიშებში. შეგიძლიათ წარმოიდგინოთ, რა მიმართულებით წავა ეს“, — განაცხადა მარტა კოსმა „ტაბულას“ ჟურნალისტის კითხვაზე პასუხისას.
ევროკომისიამ ევროკავშირის მომავალი გაფართოებისთვის მოსამზადებელი დოკუმენტების პაკეტი უკვე მიიღო. ევროკომისიის ინფორმაციით, დოკუმენტები ითვალისწინებს გაფართოებისწინა პოლიტიკის გადახედვას, განსაზღვრავს პოლიტიკურ ორიენტირებსა და იმ ქმედებებს, რომლებიც ევროკავშირს მომავალი გაფართოებისთვის მოსამზადებლად სჭირდება.
2026 წლის გაფართოების პაკეტის ფარგლებში ევროკომისია საორიენტაციო საგზაო რუკებს ოთხი კანდიდატი ქვეყნისთვის — ალბანეთისთვის, მოლდოვისთვის, მონტენეგროსა და უკრაინისთვის — წარადგენს.
საქართველო ამ ოთხ ქვეყანას შორის არ არის.
