მსჯავრდებულ გიორგი დავითაძის მამა, ავთანდილ დავითაძე, სახალხო დამცველ ლევან იოსელიანის განცხადებას ეხმაურება, რომლის თანახმადაც, მის მიერ ნანახ კადრებში არ ჩანს, რომ გიორგი დავითაძე „თითით გააუპატიურეს“.
ავთანდილ დავითაძის განცხადებით, ლევან იოსელიანი სახალხო დამცველის მოვალეობას ვერ ასრულებს და, მისი შეფასებით, ის არა მოქალაქეების, არამედ ხელისუფლების ინტერესებს იცავს.
„ასე რომ, ჩვენ, საქართველოში სახალხო დამცველი უკვე აღარ გვყავს! ეს არის ამ ხელისუფლების დამცველი და მგონი ისეა დაშინებული, როგორც გიორგის მოექცნენ, ისე რომ არ მოექცნენ, ამიტომაც ვეღარაფერს ამბობს. ეს კაცია ლევან იოსელიანი, რომელიც არა ხალხის უფლებებს და წამებული ადამიანის უფლებებს იცავს, არამედ „ქართული ოცნების“ უფლებებს იცავს“, – განაცხადა ავთანდილ დავითაძემ.
ამ წუთებში სპეციალურ პენიტენციურ სამსახურთან გიორგი დავითაძის ოჯახის წევრები და მხარდამჭერები აქციას მართავენ. მათ ადგილზე სხვადასხვა შინაარსის ბანერები აქვთ გაშლილი, ასევე სიმბოლურად სამედიცინო ხელთათმანები უკეთიათ.
ცნობისთვის, მსჯავრდებულმა გიორგი დავითაძემ თბილისის სააპელაციო სასამართლოში განაცხადა, რომ რუსთავის N6 პენიტენციურ დაწესებულებაში ბადრაგის თანამშრომლების მხრიდან სექსუალური ძალადობის მსხვერპლი გახდა. მისი მტკიცებით, შემთხვევა დეესკალაციის ოთახში მოხდა, მასში რამდენიმე პირი მონაწილეობდა და „ყველაფერი კამერებში ჩანს“.
სპეციალური პენიტენციური სამსახური დავითაძის ბრალდებას უარყოფს და მას დეზინფორმაციას უწოდებს. უწყების განცხადებით, დავითაძის მიმართ „არათუ სექსუალური, არამედ არანაირი სახის ძალადობას არ ჰქონია ადგილი“.
